Ka Vidya Samiksha Kendra kan pynjanai ban ai jinghikai kham bha ha Jylla: Rikkam

U Myntri ka tnad Pule puthi ka sorkar jylla u Rikkam A Sangma, ula ong ba ka Vidya Samiksha Kendra kan pynkylla dur ia ka pule puthi sha kaba kham janai. U Rakkam A Sangma u la pyllait paidbah ia ka Vidya Samiksha Kendra ha ophis ka Directorate ka Educational Research & Training (DERT) Annexe ha Malki, Shillong.

Ka tnad pule puthi ka jylla, ryngkat ka jingiatreilang bad ka Samagra Shiksha State Education Mission Authority of Meghalaya (SEMAM) lyngba ka Vidya Samiksha Kendra ka thmu ban pynkup bor ia ki samla pule ban jop ia ka thong ban ai ia ka jingnang jingstad ba bha tam da kaba pyndonkam ki tiar katkum juk stad ne artificial intelligence. U myntri ka tnad pule puthi u la ban jur ban wanrah ia ka jingmyntoi ia ki paidbah na kane ka sienjam watla kan don ki jingtynjuh ha ka jingpyntreikam ia ka hynrei kan sa siew spah ha ki por ban sa wan.   

 U la ong ba ia ka Vidya Samiksha Kendra la pynwan dur ban ai ka jinghikai bad ban pyllong ia ka pule puthi kaba kham bha ha ka jylla. Shwa ia kane, la ioh ruh ia ka jingkren na u Advisor ka tnad pule puthi ka sorkar, u bah H.M Shangpliang uba la ong ba ka Vidya Samiksha Kendra ym tang ba kan pynsuk ia ka jingtreikam hynrei kan wanrah ruh ia ka jingshai bad ka jingkhuid ha ka jingtreikam ka tnad pule puthi.