U President ka Voice of the People Party (VPP) u bah Ardent Miller Basaiamoit ula ong ba ka jingbeh jong ka lyer ka VPP ka la pynsheptieng ia kiwei ki nongmihkhmat ki nongialam na kiwei ki party ha kane ka jylla.
U bah Ardent u la ong ha ka jingshisha hadein ka ilekshon MLA dei ban pynlong sa ia ka MDC ilekshon hynrei ki la pynlong shwa ia ka MP ilekshon da ka jingthmu ba ka VPP kan jah ka lyer ka ilekshon MP.
“Ki la pynjlan shi pynjlan ia ka MDC ilekshon da ka jingthmu ba ka VPP kan rem ha kane ka MP election, hynrei kine baroh ki kylla khongpong namar ki ioh ia ka vote bym pat ju ioh mano mano ha ka jylla bad ka ri baroh kawei,” ong u bah Ardent haba kren ha ka jingialang ai khublei ia ki paidbah kiba ai jingkyrshan ha kane ka MP ilekshon ba long hynnin ka sngi ha madan Smit.
U bah Ardent ula ther ruh ia kito kiba sdang ban pyrshang ban pynsniew dur ia ka VPP ban kynnoh ba ka jingjop ka VPP kan sa wanrah ia ka jingpynkulmar ia ka ri Khasi bad ban pyntieng ia kiwei pat ki jaidbynriew.
U nongialam ka VPP ula ong, ba ki briew mynta ki la sdang namar ba haba ki leit thied jingthied ki peit don Guarantee bad ka VPP ruh ka la ioh ia kum kine ki nongkyrshan kiba la ai Guarantee ym tang ha ka MP hynrei ha ka MDC ruh kin pynjop ia ka VPP.
“Ym tang katta ula ong ba ki nongialam ka VPP ki dei kiba don ia ka Guarantee ym tang ha ka MP hynrei ha ka MLA 2028 ruh ki don ia ka Guarantee ban ioh ban synshar marwei bad u 2028 kan dei ka pali jong ka VPP’, ula ong.
U bah Ardent ula ong ba ka VPP kan bat triang ia ki 32 tylli ki konstiwensi bad kin nym ailad ba ka vote kan syntuid noh.
U la ai khublei ia ka Jaintia Hills kaba la wanrah burom bad ka la kut ka jingong ba ha Jaintia Hills tang u heh spah uba lah ban iakhun ilekshon.
“Nga ai khublei kyrpang ia ki para pnar ba ngi la jop ia ka bor jong ka pisa bad nga kwah ban ai khublei ruh ba phi la pyllait por mraw ia lade na ka jingtieng,” ula ong.
