Ka VPP kadei ka seng kaban pynkylla khongpong ia ka riti dustur u Khasi: Badariti

Nongstoin Iaiong: Ka seng HSPDP bad UDP kiba dei ki seng riewlum hapoh ka kynhun jong ka Regional Democratic Alliance (RDA) kum shi bynta ban pynkhreh ïa ka MP elekshon ka la pyni ïa ka jingïatylli mlon ban pynïeng ïa ki lama jong ki ha ka jingïalang mynta ka sngi ïa kaba la pynlong ha ïew Rambrai.
U Bah Robertjune Kharjahrin uba dei u kyrtong ïamonlang jong ka RDA ula wan ban ai jingpynshai halor ki nongrim kaba kum u kyrtong u don ïa ka thong ha ka jingiakhun ia ka elekshon MP Lok Sabha na ka Shillong Parliamentary Constituency.
U Bah Robertjune Kharjahrin ula pynshai paidbah ïa ki nongrim jong ka kynhun bad ula kyrpad ïa ki paidbah ba kin ailad ïa u ban ba un poi sha ka thong bad ba un ïeng ban ïada ïa ka hok ka jinglong trai ïa ka Khyndew ka Shyiap, ban pynkhlaiñ shuh shuh ïa ka District Council bad kumjuh ruh ban ïoh laitluid ha ka ban shakri ne mane blei.
Ka kong Badariti Lyngdoh kaba dei ka khun pyrsa jong u Maieit Hopingstone Lyngdoh kala ong, ba ka seng VPP kadei ka seng kaba la mih na ka bynta ban pynkylla khongpong ia ki riti dustur jong u Khasi bad kala ong ruh ba ka VPP ka dei ka sur u Paidbhur bad kam dei satia ka seng ne ka sur u paidbah.
Ha katei ka jingialang la ia donlang u Bah K.P.Pangniang u President rangbah ka seng HSPDP, u Bah Metbah Lyngdoh President rangbah ka seng UDP bad ki nongialam jong kitei ki artylli ki seng sain pyrthei bad ki paid nongkyrshan.