Kam dei kaba suk ba shu kam ba kano kano ka seng sain pyrthei (Party) kan shu jah kyrteng na ka Jylla namar ki dei ki paidbah kiba peit bad bishar ïa ki Party. Ïa kane la ong da u Nongialam ka TMC u Dr Mukul Sangma halor ka jingkam ki Nongialam ka National People’s Party (NPP) ba ka Congress kan jah kyrteng noh napoh Meghalaya. Lah ban ong ba kane ka jingkam ka NPP ba ka Congress kan jah kyrteng na Meghalaya hadien ba 3 ngut ki MLA ka Congress ki la pyniasoh ia lade sha ka NPP.
Haba kyntait ia ka jingkam ba ka Congress kan jah kyrteng u Mukul u la ong, “Ban shu kren ka long kaba suk hynrei kam dei kaba suk ban ong ba kano kano ka Party kan shu jah kyrteng namar haba kut dei ki paidbah ban peit bad nongbishar, ia kano ka Party ban dang pynneh”. U Mukul u la ong, kino kino ki Nongialam Party (kynthup ma u) kim don hok ban shu kam ba kata ka Party kan jah kyrteng noh napoh Meghalaya.
Nalor kane u Nongia-lam ka TMC u Dr Mukul Sangma u la ai ksai ruh ba ka lah ban don ka jingkylla ha ka sain hima sima bad u la kob ba ka NPP ruh kan sa mad ki jingtynjuh kumba mad kiwei ki Party. “Nga ong ïa kane, namar nga tip, ki jingjia ba jia ha kine ki sngi hapoh ka NPP” la kam u Dr Mukul.
