U Lamphang ka iing dorbar ka Jylla u Thomas A Sangma ula pyntip ba ka Meghalaya TMC ka la kam ia ka shuki Nongialam ka Liangpyrshah hadien ba u MLA ba marwei ka seng Congress u Bah Ronnie V Lyngdoh u la ai ka jingkyrshan ia ka TMC. “Nga la ioh ia ka shithi kaba la dawa ban ai noh ia ka shuki Nongialam Liangpyrshah sha u Dr Mukul Sangma. Nga dang peit bniah ia ka shithi bad shen ngan sa shim ia ka rai” la ong u Lamphang. U Lamphang ula ong, lada ka TMC bad ka Congress ki la ioh 10% ka bun paid ha ka iing dorbar ba 60 ngut namar ki don 6 ngut ki MLA, hynrei u hap ban bishar bniah shwa ba shim ia ka rai. U Lamphang u la pyntip katkum ka jingdawa jong ka TMC, namar ba ki don ka jingkyrshan na u MLA ba marwei ka Congress, ka TMC ka la kyrpad ba ia ka shuki Nongialam Liangpyrshah dei ban ai sha u Dr Mukul Sangma bad ia ka shuki Chip Whip ka Liang Pyrshah sha u Bah Ronnie V Lyngdoh.
Haba pynthikna ia ka jingkyrshan ia ka TMC, u MLA ba marwei ka Congress u Bah Ronnie V Lyngdoh ula ong, “Hadien ba ngi la iakren bad u Dr Mukul Sangma, ngi la rai ban iatreilang bad ban pynthikna ba ka shuki Nongialam Liangpyrshah kam dei ban shu ieh thylli bad namar ba u dei u nongialam ba Rangbah tam bad ka TMC ka dei ka Party ba bun MLA, Nga la rai ban kyrshan ia u Dr Mukul kum u Nongialam Liangpyrshah ha ka iing dorbar thawain ka Jylla”. U bah Ronnie ula ong, ba ka shuki Nongialam Liangpyrshah ka dei ka kam ba kongsan hapoh ka iing dorbar namar u Nongialam Liangpyrshah u don bynta ha ki komiti bapher bapher kum ka nuksa ka state security council (SSC).
“Ngi don ia ka SSC, mynta lada ym don Nongialam Liangpyrshah hapoh ka iingdorbar, na ka liang ka Liangpyrshah kan nym don ka jingmihkhmat ha ka SSC kaba long kaba kongsan bha bad haba don ka jingpyrshah kaba khlain, kan don ka jingiaid beit bad ka jingshim rai” u la ong. U Bah Ronnie u la pyntip ruh ba ka TMC bad ka Congress ki la thoh sha u Lamphang ka iing dorbar thawain, ba ia ka kam Nongialam Liangpyrshah dei ban ai sha ka TMC bad u Chief Whip ka Liang Pyrshah sha ka Congress. Lah ban kdew ba Bah Ronnie ula shah thung kum u Nongialam Liangpyrshah naduh u snem 2023 hynrei u la iehnoh kam kum u Nongialam Liangpyrshah ha ka 27 tarik u Nailar namar ka Congress ka don satang 1 MLA hapoh ka iingdorbar thaw ain ka Jylla.
