Ka KSU kala kren shai, katba ka Sorkar Jylla ka dang eksamin ia ki jingai jingmut ban pyrkhing ia ka jingwan rung ki briew kiba nabar shapoh ka jylla, hynrei ka seng kan iaid beit shakhmat ha kaban pynlong iaka jingkhynra ha kylleng ki jaka.Ia katei la pynpaw da u President ka KSU u samla Lambokstarwell Marngar hadien ka jingwan sha ka jingialang kaba la khot da u Myntri Rangabh ka jylla hapoh ka kamra treikam ka jongu hapoh Secretariat. U Lambokstarwell Marngar ula ong ba ka jingialang bad u Myntri Rangbah kam shym la long kaba seisoh ne ka bym seisoh namar u Myntri Rangbah ula pynpaw ba yn sa khmih bniah ia ki jingai jingmut jong ka seng ban tehlakam ia ka jingwan rung kyrthep ki briew kiba nabar shapoh ka jylla. Ula ong, ka seng kala ai jingmut ba dei ban pynrung ia ki kyndon kiba pyrkhing ha ka Inter State Migrants Worksman Act ban pynkhlain iaka jingpyrkhing ia ka jingwanrah ia ki nongbylla nabar ka jylla. Ula ong ba ka seng kala banjur iaka jingdonkam ban pyntreikam ia ka Meghalaya Residents Safety and Security (MRSSA) Act 2016 katba ia ka MRSSA kaba la dep ban pynkylla thymmai kam pat ioh ia ka jingmynjur bad na ka liang u Myntri Rangbah ula pyntip ba yn sa lum ia ka jingialang bad ki sengbhalang, ki khlieh nongsynshar ban iakren ha kaba iadei bad ka MRSSA.
U Nongialam ka KSU ula ong, katba ka sorkar jylla ka dang khmih bniah, ka KSU kan iai bteng ban pynlong ia ki jingkhynra ha man la ki jaka haduh ban da iohi ba kita ki ain jong ka jylla kin long katkum ka jingkwah jongu paidbah ba ka MRSSA bad ka ILP kidei ban treikam noh haka jylla.“Lada ki jingïakren kin kut tang ha kaba ka sorkar kan bishar bniah ïa kine ki jingdawa kiba la sahteng, kumta ngin ym don lad shuh hynrei ban bishar bniah ïa ki shabar jong ka Secretariat halor kiei kiei kiba ngi donkam ban pyndep. Lada ka sorkar ka dang shim por ban eksamin ïa ki aiñ kiba kongsan, ngi ruh ngim don por shuh ban ap hynrei ban shim khia hi ha madan. Ka jingkhynra ka sneg ka long ka jingkyrsiew thiah ïa ka sorkar jylla ba ka kamram jongka ka long ban shimkhia tyngeh bad ka Sorkar Pdeng na ka bynta ban pyntreikam noh mardor ïa ka ILP ha Meghalaya,” ula ong. Haba kylli la ka KSU kala iakren eiei bad u Myntri Rangbah halor ka jingshah khot hajir ki dkhot ka seng kiba pynlong ia ka jingkhynra iaki mynder, u Nongialam ka KSU ula ong, “Ka KSU kam shym la kren eiei ha kaba iadei bad ka jingshah khot hajir ki dkhot hynrei kala leit ban kren beit thik tang halor ki mat kiba ktah ia ka jaidbynriew”.
Katba u General Secretary ka KSU u samla Donald V Thabah ula ong, ka seng kala pynapw ba ka Meghalaya Identification, Registration (Safety & Security) of Migrant Workers Act, 2020 kadei ka Aiñ kaba “tlot” namar ba ka bun palat ki jingduna bad ka long kaba donkam ban pynbeit thymmai noh ia ka khamatam ha kaban pynshitom da kaba tyngeh ia kiba pynkhein ia kane ka aiñ.U Samla Donald Thabah ula ong, ba la pyntip ia ka seng, ba ka sorkar NDA kaba ialam da ka BJP kala iathuh ha ka sorkar MDA ba ialam da ka NPP ba ka jingpyntreikam ia baroh ar ka ILP bad ka MRSSA kan pynkheiñ ia ka Article 19 jong ka riti synshar ka ri India, ha kaba kan khanglad ia ka leit ka wan jong ki briew ha ki katto katne ki jaka ha ki bynta jong ka ri. Hynrei haduh mynta kam pat don kano kano ka jingpyntip kaba thikna na ka sorkar pdeng halor ka ILP bad kumjuh ruh ban pynrung ia ka Eighth Schedule ha ka riti synshar ka ri.“Lada pyntreikam ia ka ILP ha Meghalaya kan pynkheiñ ïa ka Article 19, ka jingkylli kaba mih ka long, balei ka sorkar NDA ka ai ILP ïa ka Manipur ha u snem 2019 bad lada ka lah ban ai iaki balei kim ai pat ia ngi?. Ka Sorkar Pdeng ka ong, ba ka dei namar ka Article 19 hynrei ka jingkylli jong ngi ka long, ba lada ka ILP ha Manipur, Nagaland bad Mizoram, Arunachal Pradesh kim pynkhein ia ka Article 19 kumno kan long ka jingpynkhein tang ha ka jylla jong ngi. U samla Donalad ula iathuh ruh ba Myntri Rangbah ka jylla ula pynpaw ruh ba ka jylla kala don ia ka Sixth Schedule. “Ngi don ia ka Sixth Schedule bad kumno ka Sixth Schedule kan iada pura ia ngi namar lada ngi peit ia ki jaka kiba dei ki ‘Schedule Area’ kum ka Pynthorumkhrah, Laban bad kiwei kiwei, ngi iohi ba ki bar jylla kila bun paid ban ia ki trai ri trai muluk, kumta yn ym lah ban ianujuor ia ka Sixth Schedule Schedule bad ka ILP,” la ong u General Secretary ka KSU.
