Kawang petrol bom ki runar ha phyllaw ïing briew ha Umsning

Ha kawei ka jingjia kaba sngew triem, ki runar ki bym lah ban ithuh durkhmat ki la leit ban kawang da u petrol bomb ha ka phyllaw iing jong u Bah Lovercuf Nongshli ha ka shnong Patarim, Umsning, hynrei donbok ha kane ka jingjia kam shem la don kano kano ka jingjia kaba sngewsih lait noh ka jingingkhong ba malu mala jong kawei ka kali puh shilum bad kawei ka auto truck kaba la pynieng ha kane ka phyllaw iing. Katkum ka jingtip ba la iohlum, la ong, ba ki runar bym lah ban ithuh ki la leit ban kawang da u petrol bomb ha katei ka phyllaw iing kaba la pynieng ia ka JCB bad ka auto truck ha ka por 1.20 eiei mynstep hynrei donbok pat da ka jingiohsngew bad ka jingkloi ki trai iing ban pynlip noh ia ka ding la lah ban tem noh ia ka jingduhnong kaba khraw na ka jingingkhong jong kine ki kali ba la pynieng ha kane ka phylaw iing.

La iathuh ruh, ba kane ka auto truck kaba don ia u number ML 10 A 4205 ka dei kaba la dei trai da u wei u bar jylla ba la tip kyrteng kum u Horander Prasad kaba u ju pyndonkam ban kit mar mata bad ym tip pat na kaei ka daw ki runar ki wan ban kawang da u petrol bomb.

Na ka liang ki bor pulit, ka Umsning Police Station, tang mar ia ioh jingtip ki la leit marmar sha katei ka jaka ban pynlong ia ka jingtohkit bad ruh ban thwet ia ki runar kiba donkti ban leit kawang da u petrol bomb ha katei ka phyllaw iing jong u Bah Lovercuf Nongshli, la pyntip ruh, ba kiba donkti ha kane ka kam lada lap kin shah pynngat ha ki kyndon ain kiba tyngeh.