Kem ka HNYM ia u briew ba bam pisa T.20 hajar ba kular ai kam

U wei u rangbah briew uba la tip kyrteng kum u Dominik Marwein na ka shnong Proiñ jong ka thain Mawshynrut u la shah kynnoh ba u la bam pisa haduh 20 hajar tyngka ryngkat ka jingkular ban pynioh kam sorkar (DSC) ia uwei u nongwadkam uba la tip kyrteng u bah Sunday Rimait.

Haba ïadei bad katei ka jingjia u bah Sunday u la leit ban ujor sha ka seng HNYM bad ka seng hapoh ka jingïalam jong u bah Tailan Lyngkhoi President HNYM West Khasi Hills District ka la leit mar mar ban wad ïa utei u briew ha ïingsah jong u bad ki la ïoh ban kem ruh ïa utei u briew na iing jong u hi.

Ki nongialam jong katei ka seng ki la iathuh ba mar sien poi ka seng, utei u bah Dominik u la sdang ban kren kyllaiñ kyllaiñ hynrei tang hadien katto katne por, utei u briew u la phla noh ïa ka jingshisha ba u la shim ïa ka pisa na u bah Sunday bad u la kular ruh ban siew noh hapoh ka shitaïew da kaba ïa kular ruh lyngba ki jingïathoh soskular bad u la soi ruh ïa la ka kyrteng ban pynshisha ha khmat jong ka seng HNYM WKHD. Ka seng ka la kyntu ruh ïa ki paidbah ba kin long kiba husiar na ki briew kiba kular ïa kiei kiei ki bym lah ban long bad kim dei banshu ngeit khlem da wad bniah la ka long ne em kaba shisha.