Da ki spah ngut ki nongialam sengbhalang kiba kynthup ia ka Khasi Students Union, ka Hynñiewtrep Youth Council bad ka Hynñiewtrep Integrated Territorial Organisation ha ka 27 tarik mynstep ki la leit ban ker kut ia ka khyrdop ban mih ki nongleit nongwan jong ka Shillong Airport ha Umroi Ri Bhoi. Kane ka jingwan hiar ki nongialam sengbhalang sha ka Shillong Airport, ka la long hadien ba la saphriang ka khubor halor ka jingthmu ban wan iuh kjat jong u nongialam ka kynhun shit niam Hindu ba wan shim bynta ha ka rally pyrshah bam doh masi kaba la thmu ban pynlong ha nongbah Shillong ha ka 2 tarik Risaw. Lah ban kdew, ba ka kynhun Gau Dhwaj Sthapan Bharat Yatra’ lane ka kynhun kaba pyrshah ia ka jingbam doh masi da kaba kam ba ka masi ka dei ka Kmie, ha kaba u nongialam kane ka kynhun u Jagadguru Shankaracharya Swami Shri Avimukteshwaranand Saraswati un wan ban iuhkjat ban shim bynta ha ka rally pyrshah bam doh masi ha Meghalaya ha ka nongbah Shillong.
U Bah James Hitlar Mawphniang, General Secretary ka KSU, North Khasi Hills District, u la iathuh ba ka seng kaba la ia lum ha Umroi Airport da lei lei kan ym ai lad ia kino kino ki kynhun shit niam ban wan ban batai stad ne ialam bakla ia ka jingngeit ba la hikai naduh ki mynbarim naduh ka rukom bam dih, ka riam ka beit ne ka lehniam leh rukom, lada don ba pyrshah ialam bakla ngin ym ailad satia ia kum kita ki kynhun, ngin peit pyrman beit kumno kine ki briew ki lah ban wan rung suk shapoh ka jylla Meghalaya. U Bah Roykupar Synrem, President ka HYC ula iathuh, ba ka seng da lei lei kan nym ai lad ia kita ki nongialam ka Seng Hindu ban wan ialap bakla ne pynbor ia ka rukom bam rukom dih ne ka ngeit niam, u la pynrem ruh ia ka jingbym don ka jingkitkhlieh da u Myntri Rangbah ka jylla ban khang lad ia ka jingthmu pynlong ia ka Rally pyrshah bam doh masi hapoh ka jylla, da kaba ong ruh, ba lada jia eiei kaba sngewsih ha kane ka jingthmu jong katei ka kynhun shitniam la ka dei ha ka lynti iaid ne por pynlong rally, ka sorkar jylla ka dei ban shim hi ia ka jingkitkhlieh baroh.
Shuh shuh ruh, dei tad hadien 1 baje nohphai sngi, ba u Majistor ka Ri Bhoi, u la pynshai ba u nongialam ka Seng Hindu un nym poi shuh ha ka 27 tarik Nailur bad ba na ka liang ki bor district ki la pyntikna ba kin ym ai lad da lei lei ia une u nongialam ban hiar hapoh ka kad liengsuiñ Umroi ban iada na ki jingjia ba sngewsih, kumta hi ki nongialam sengbhalang da ka jingsngewhun ki la ia pra noh na katei ka jaka jong ka Shillong Airport.
