Mynta ka sngi ki pulit Enforcement jong ka KHADC hapoh ka jingialam u Inspector incharge jong ka thain Ri Bhoi u Bah F. Kharsyntiew da ka jingbitar ki la hiar sha Khanapara ban khang tala ia ki dukan jong ki bar jylla kiba don ha kane ka thain ki bym don trading license, kaei ba la pynlong ia ki pulit ka Enforcement ban bitar ka dei namar man ba ki leit ban khynra trading license ha kine ki thain ki ju leh buituh tang mar iohi ia ki pulit ki ju khang pynstet ia la ki dukan bad phet ia lade kaba ju jia man la ka por.
Kaba la pynbitar ia ki pulit ka Enforcement mynta ka sngi ki la ioh ban khang tala katto katne ki dukan ba ju mlien ban ialeh iarieh kum ki khnai bad ka miaw, kaba la pynieng shkor syndon ia ki nongshong dukan ha Khanapara haduh ba kin da pyndem tdong syndon ban wan panmap bad ki da kular syndon ban leh noh mardor ia ki trading license. Hakane ka jingkhynra mynta ka sngi la iohi ba ki bar jylla ki la mih ryntih ban wan shakhmat ban pan jingmut na ki pulit ka Enforcement kumno ban ioh ia ka trading license, bad na ka liang ki pulit ruh ki la batai ia ki kumno ban apply ia ki, bad la ai ruh da ki notice ba hapoh 10 sngi ki dei ban pynbiang ia ki license lym kumta lada lap ki dang plie kin khang dam noh ia ki dukan baroh ki bym don ia ka license.
Na ka liang u Inspector incharge ka Ribhoi u Bah F. Kharsyntiew u la pynshai sha ki nongshong dukan ba haba wan ki pulit ka Enforcement kim dei ban khang ia ki dukan bad phet ban leh buituh kaba wanrah ia ki jingbitar bad kulmar, hynrei ki dei ban wan iakren lada don kano kano ka jingeh khnang ba kin suk hadien habud, bad ki dei ban register ia ki dukan jong ki sha Meghalya namar kine ki lain ka dei khappud bad ka Assam kaba ju mih bun ki jingkajia pud bad kine ki dukan kim dei ban tieng namar ki don ha u pud u sam jong ka Meghalaya.
