Ka All Khasi Meghalaya Tourist Taxi Association hynne ka sngi ka la dawa na ka sorkar jylla ba kam dei shuh ban shah ia ki kali Tourist kiba na Assam ne nabar ka jylla ba kin leit kamai sha ki jaka jngohkai kiba don ha kylleng ki bynta jong ka jylla Meghalaya. Ka AKMTTA ka la pynpaw ia katei ha ka jingiakynduh bad u Myntri ka tnad jngohkai u Bah Paul Lyngdoh ha kaba u President ka AKMTTA u bah Ricaldinus Dohling ula aiti syndon ia ka dorkhas bad ia ki jingtip kiba la wad bniah da ka seng halor ka jingwan kamai ki kali na bar jylla ha Meghalaya. U Bah Ricaldinus ula ong, ba ka jingioh lad ki kali Tourist na Assam ban kamai ha ki jaka jngohkai ha Meghalaya ka la ktah shi katdei ia ki nongniah Tourist kali ka jylla khamtam haba bun kim ioh lad shuh ban kamai bad ka pynlong ia ki ban shem jingeh ban pyndap ia ki jingdonkam ha iing ka sem.
Ula iathuh ba ka AKMTTA da kawei ka sur ka la shim ia ka rai ha ka 1 tarik u Naitung ban kyrpad ia ka sorkar jylla ban pynmih ia ka jingpynbna ban khang noh ia baroh ki kali kiba nabar ka jylla ba kin kit ia ki paidbah na Shillong sha ki jaka jngohkai kiba don ha kylleng ka jylla bad ka AKMTTA ka la pyni ruh ia ka jinglong jingman katkum ka jingwad bniah kaba la leh da ka seng ba na ki 5120 tylli ki kali kiba la rejistar ha Meghalaya, ki don kumba 4014 tylli kiba kamai kim ioh ia ki briew ne ‘Passenger’ man ka sngi bad ki nongniah kali Tourist ki la mad ka jingduhnong ba khraw bha namar ka jingioh lad ki kali na bar ban kamai laitluid ha ka jylla.
U Bah Dohling ula pynpaw ruh ka AKMTTA ka la pynpaw ba ki don haduh 3543 tylli ki kali kamai ba wan kit ia ki nongjngohkai sha ka jylla man la ka sngi bad 2437 tylli na kitei ki dei kiba wan na shabar ka jylla bad ka AKMTTA ka la ban jur ba ki kali Tourist Taxi ba nabar ka jylla ki lah ban wan kit ia ki nongleit nongwan sha ka jylla, hynrei ym dei pat ban ai lad ban leit kit ia kitei ki nongjngohkai ha kylleng ki jaka jngohkai kiba don ha ka jylla namar kane ka ktah ia ka kamai kajih ki trai jylla. U Nongialam ka AKMTTA ula iathuh ba ka seng ka la ioh ia ka jingkular ba u Myntri Sorkar yn sa khot iakren ia ki hadien ar taiew ban ia shong pyrkhat ban leh eiei halor katei ka jingdawa ka jong ki.
