Kiba bun ki nongtrei ka JHADC mynta ka sngi kila hap shong shabar ka khyrdop jong ka ophis treikam namar hadien ba kila wanpoi sha kane ka ophis hynne ka step naka bynta ban pyndep iaka kamram haki kamra treikam kumba ju leh manla ka sngi kim shym la iohlad shuh ban rung shapoh namar ba ka JHADC kala khang tala iaka khyrdop ha ryngkat ka jingpahara ki bor pulit. Ka daw ba ka JHADC ka khang tala iaka khyrdop dei namar ba ki nongialam ka VPP ki thmu ban rung shong kyllaiñ myngngor shapoh phyllaw kane ka ophis treikam, halor ka nongrim ban dawa siew lut baroh ka tulop ba sahteng ki nongtrei JHADC. Namar bym ioh rung shapoh ki nongialam ka VPP kila pynlong noh ka jingshong kyllaiñ myngngor hakhmat khyrdop ka JHADC ha ryngkat ki pakat dawa naka sorkar ba kan pyllait noh iaka tulop ki nongtrei.
Katba ki nongtrei ka JHADC pat namar ba kim lait rung shuh shapoh ophis treikam kumta kila hap ban ia shong harud surok, ban shong hapoh ka park ba don hajan kane ka ophis treikam bad ha kino kino ki jaka ba ki iohlad kat bym pat kut ka por treikam ophis. Ki nongialam ka VPP hadien bala kut ka jingiakhih shong kyllaiñ myngngor haka por janmiet kila ong ba kane ka dang dei tang ka jingsdang jong ka jingiakhih bad lada ka sorkar kam sngap naka bynta ban siew dep lut iaka tulop ki nongtrei jongka JHADC kin sa lum jingialang ban pynkhreh da rai iakhih ba kham tyngeh shakhmat.
Nangta haka jingiadei bad ka jingkhang tala ka JHADC iaka khyrdop ka ophis treikam baroh shisngi u Damewanhi Rymbai organising secretary VPP, East Jaiñtia Hills uba long ruh u State Executive Committee VPP u ong, kane ka pyni ba ki nongtrei ka JHADC naduh u khliehduh jong ka u CEM ruh ki iasnohkti lang bad kane ka jingiakhih jongki, namar wat ki nongtrei ka council ruh bun kim iohlad shuh ban rung shapoh naka daw bala khang tala iaka khyrdop.
