U District Magistrate ka Ri Bhoi District, u Abhilash Baranwal (IAS) u la pynmih ka hukum hapoh Section 163 jong ka Bharatiya Nagarik Suraksha Sanhita, 2023 ban khang bad tehlakam ia ki kam ba ia dei bad ka um ha ka pung Umiam ha ka 14 Naiwieng, 2024. La pyntip ba la pynmih ia kane ka jingbthah na bynta ban iada na kino kino ki jingjia ba sngewsih ne kaba ktah ia ka jingshngain jong u paidbah ha ka por ban pyni paidbah ia ka jinghiar bad kiew ki liengsuiñ kiba lah ban iaid ruh ha um (sea plane demonstration) ban pynlong da ka tnad Transport Department jong ka Meghalaya. Ka jingpyni ia ka sea plane kan sdang ha ka por 9:00 baje mynstep ha pung Umiam, Ri Bhoi District, ha kaba la kyrmen ruh ban kane ka jingpyni paidbah ia ka rukom her ne hiar kine ki liengsuiñ kan khring ia ki paidbah.
Kumta ban iada na kino kino ki jingjia ba sngewsih, u DM, u la pynbna, ba ka jingdon ki briew bad ki jingpyniaid kam iadei bad um ha kane ka jaka, kum ka jingialum paidbah, ki jingialehkai ha ka um bad kiwei ki jingpynbyrngia—ki lah ban wanrah jingma ha ka por pyniaid ia kane ka liengsuiñ. Ban lait na kino kino ki jingjia bad ban pyniaid ia ka jingpyni sea plane khlem jingwit, baroh ki kam iadei bad um, kynthup ia ka jingdon briew ha katei ka jaka, yn khangnoh naduh ka por 7:00 baje mynstep haduh 1:00 baje nohphai sngi ha ka 14 Naiwieng. Kino kino kiba pynkhein ia kane ka hukum kin ngat ha ki kyndon ain hapoh Section 223 jong ka Bharatiya Nyaya Sanhita, 2023.
Ka District Police jong ka Ri Bhoi District, ka Meghalaya Energy Corporation Ltd. (MeECL), bad ka Transport Department kin khmieh bniah ia kane ka jingbthah. Kane ka hukum ka trei kam noh mardor bad kan neh ha katei ka jaka ba la khang tad haduh ka jingbthah da kumwei pat. Kane ka jingbthah ka la pynmih na ka bynta ka jingshngain u paidbah, bad la kyrpad ia ka jingiatreilang jong ka kynhun paidbah ban iarap ban pynlong ia kane ka jingpyniaid sea plane khlem jingwit.
