Ka jingshakri ia ki paid nongpang hapoh ka Civil Hospital Nongpoh Ri Bhoi District la kynnoh ba ka la nang hiran na kawei ka sngi sha kawei pat khamtam ka jingtlot jong ki bor ba dei khmieh ban pyntikna ban ai jingshakri ba biang ia ki nongpang,ia kane la pynpaw da i Kong Bindas Syiem i nongshong shnong ka thain Umden.Lah ban kdew, ba i kong Bindas Syiem, hadien ba i la pynsangeh ia ka jingiakhih da kaba shong shah thngan khlem pud ha nongbah Shillong mynta la 6 eiei, hadien ba i la wanphai sha la iing i la kem pang noh shiteng lynti ha Umsning bad la pynkit noh sha Civil Hospital Nongpoh ban ioh jingsumar namar ka jingtlot ha ka bor mer jong i hynrei Kum ka nongpang ka la mad pynban ia ka jingbym shimkhia jong ki bor pyniaid ka Civil Hospital Nongpoh ban sumar ia ki nongpang.
Haba kren sha ki Nongthoh khubor, ka Kong Bindas Syiem ka la iathuh, mar ia poi ha Nongpoh Civil Hospital, ka la khie tlot bha ha ka bor met bad ha ka shiteng miet ka la donkam kyrkieh ia ki nos ne doctor namar bym iaid bha ka drip bad ka nongap ia i ka la leit khot ia ki nos kiba don ha duty hynrei kim shem la plie satia ia ka jingkhang bad ki khlem wan satia ban peit ia i watla I la khie tlot bha hynrei ki nos ki la wan khmieh ia i haduh 6 shiteng eiei mynstep.I Kong Syiem, i la iathuh ruh ba ym tang ma i ba la mad ia kane ka jingbym shimkhia na ki bor ka Civil Hospital Nongpoh hynrei don ruh sa kawei ka longkmie ka kong Ibanjalin Marbaniang na Kyrdem Kulai kaba kham shitom jur bha kaba la donkam bha ia ki doctor bad nos ha ka shiteng miet bad watla ki la phah khot ia ki nos ban wan khmieh ia i hynrei ym don satia ba wan khmieh ne wan ai dawai ia i tad haduh mynstep syndon, la kyrpad ia ki bor ba dei khmieh ban shim ia ki lad ba tyngeh ia kito kiba don la ka kamram bad ki bym shimkhia pat ia la ka kamram ban pyntikna ba ki nongpang kin ioh ia ka jingsumar kaba hok.
Kane ka longkmie, ka la pynpaw ruh, ba ki jingsumar ha kane ka hospital kam long satia kaba ai jinghun ia ki nongpang namar ba ki doctor ne ki nos kim shimkhia ia la ka kamram ba dei ban leh ne pyndep, la bynrap ruh ba ki nongtrei jong ki hospital haba ki ioh tulop thikthik kumta ki dei ban shimkhia ia la ka kamram, lem kumta kumno ki nongpang kin ioh ia ka jingsumar kaba hok, ka la bynrap ruh, ba kan leit phah sumar noh shawei pat ka hospital ha Bethany Hospital namar kam hun ne sngew iahap ia ka jingleh jong ki bor ka Civil Hospital Nongpoh.
