Kumba 52 ngut ki briew ki la duh ia ka jingim na ka jingshlei um ha Jylla Assam katkum ka jingkhein haduh 5 tarik mynta u bnai, watla ka jingshah pynjulor ka dang iai bteng haduh mynta. Napdeng ki kiba khlad shlei um ki kynthup uwei khynnah ha Guwahati bad shikmie shikhun ha Khanapara kiba la khlad na ka jingtwa khyndew. Ka wat ba-ar jong ka jingshlei um ka la ktah ia 24,20,722 ngut ki briew ha ki 3,518 tylli ki shnong jong ki 30 tylli ki district. Ki district ba shah ktah ki kynthup Cachar, Kamrup, Hailakandi, Hojai, Dhubri, Nagaon, Morigaon, Goalpara, Dibrugarh, Nalbari, Dhemaji, Bongaigaon, Lakhimpur, Jorhat, Sonitpur, Kokrajhar, Karimganj, South Salmara, Tinsukia, Charaideo, Barpeta, Karbi Anglong, Golaghat, Sivasagar, Chirang, Majuli, Biswanath, Darrang, Karbi Anglong West bad ka Kamrup.
Haba iadei bad kane, ki bor sorkar kila la lah ban thaw 273 tylli ki jaka sah kyrpang (Relief Camps) bad 339 tylli ki jaka sam jingiarap lane ki (Relief Distribution Centers) ban iarap iaki ba shah ktah. Bun tylli ki wah kynthup ka Brahmaputra kila sdang kiew ka jingdon um kaba buh jingma iaki paidbah haki thain Neamatighat, Goalpara, Guwahati, bad Dhubri.
Kiwei ki wah kiba sdang kiew ka jingdon um ki kynthup ka Burhidihing ha Chenimari (Khowang), Dikhou ha Sivasagar, Disang ha Nanglamuraghat, Dhansiri ha Numaligarh, Jia-Bharali ha NT Road Crossing, Kopili ha Kampur bad Dharamtul, Barak ha Fulertal bad AP Ghat, Katakhal ha Matizuri bad ka Kushiyara ha Karimganj. Ka Indian Meteorological Department (IMD) kala pynbna ‘Red Alert’ namar ka jingjur u slap kynthup hapoh ka Jylla Arunachal Pradesh, Assam, bad Meghalaya.
