Kawei ka longkmie ba ithuh kyrteng ka Kong Monaliza Langi na ka shnong Umden Diwon ka la duh noh ia la i khyllung hadien ba ka la kum kha i khyllung ha ka jaka leit bar ha Civil Hospital Nongpoh, Ri Bhoi District. Kane ka jingjia ka la jia hynnin ka sngi 21 tarik Nailur ha ka por 6 ne 7 baje eiei mynmiet.
Katba u Bah Richard Rympeit ba dei u lok jong katei ka longkmie ula iathuh hadien ba ka kurim jong u ba armet ka la sdang khie suh, ki la ialam mar mar sha ka PHC ha Umden ha ka miet ka 20 tarik Nailur, hynrei la phah kynriah noh sha Civil Hospital Nongpoh bad na ka liang katei ka PHC kam shym la pynbiang wat ia ka ambulance bad la hap ban kit noh da ka kali shimet.
U la iathuh yn da poi ha Civil Hospital Nongpoh, ki la hap ban ap haduh 3 baje mynstep ban ioh rung shapoh ka hospital namar bym don briew shuh ha ka por mynmiet kumba 1 baje eiei, bad hadien ba la ioh jaka thiah ha hospital ki nurse ki la ai dawai hynrei ka por 6 baje janmiet ka kurim jong u ka la suh kha biang bad ka la mih ban leit shabar bad namar ka jingphlei snam ka la kum kha ia i khyllung hapoh ka jaka leit bar bad i ne i khyllung ila khlad noh.
Kane ka pynpaw ba ki doctor ne ki nurse kim shym la peit bha ban ai jingsumar ia katei ka longkmie ba ar met kum kiwei ki hospital.
