U Symbud Myntri Rangbah ka jylla u Bah Prestone Tynsong hynne ka sngi, ula lum ia ka jingialang ban khmih bniah ha kaba ia dei bad ki projek shna surok ha ka jylla.
U Bah Prestone uba khmih ruh ia ka PWD (Roads) ula lum ia ka jingialang ban iatai sani halor ka jinglong jingman jong ka jingthmu ban shna ia ki surok da ka National Highways & Infrastructure Development Corporation Ltd (NHIDCL) ha rilum Khasi-Jaintia bad Garo kaba kynthup ia ka Four Lane Road ban pyniasoh bad ka Panchgram, Assam, ka Shillong Western Bypass, katba ha Garo Hills ka jingshna surok ka kynthup ia ka Dainadubi-Darogre-Williamnagar Junction Road bad ka Tura-Dalu Road.
Haba iakren bad ki nongthoh khubor hadien ka jingialang, u Bah Prestone ula ong ba ka NHIDCL ka la dep ban pyntip ba ka la iaid shakhmat ha ka jingsorbe bad ka committee hapoh ka jingialam u DC ka East Khasi Hills, ka la treikam bha bad la lum ia ka jingialang man la ka por ioh don kano kano ka jingeh ha kaba iadei bad ka jaka ka puta jong ki trai jaka ne ki Raid, ki Hima bad ka District Committee ka hap ban shim ia ki sienjam bad ia ki lad ki lynti ban weng ia baroh ki jingeh.
U Bah Prestone ula ong “Ha West Jaintia Hills bad East Jaintia Hills, ki Deputy Commissioner ki la pynlong jingialang man la ka por ban pynbeit ia ki ishu kiba mih, kumta katba ka jingsorbe ka dang iaid shakhmat, ngi tip mano ki trai jaka kiba pyrshah ban ai jaka ne kano ka shnong kaba pyrshah ban ai jaka bad haba mih kum kitei, u Deputy Commissioner yn sa lum ia ki jingialang ban iakren bad ki trai jaka bad ki bor shnong ban pynbeit ia kitei ki jingeh”.
U Symbud Myntri Rangbah ula ong ba ka Four Lane Road kadei kawei na ki projek kaba kongsan bha ia ka jylla Meghalaya ia kaba la khot da ka ‘North East Corridor Project’ kaba la dep ban kynthup ha ka Mission 2047 da ka sorkar NDA. Kumta ka sorkar jylla, kan pynthikna ba kane ka projek kan iaid beit iaid ryntih haduh ban da aiti ia ka jaka sha ka NHIDCL khnang ba kan ioh shna noh ia ka surok Four Lane.
Halor ka surok Shillong Western Bypass, u Bah Prestone ula iathuh ba u DC ka Ri Bhoi ula sdang ban sam ia ka bai jaka sha ki trai jaka kiba la ai ia ki jaka jongki.
“Ngi lah kynjoh ia kumba 85%, sa kumba 5-6 % mynta ka taiew, ngin sa kynjoh sha ka 90%. Ha kajuh ka lynti u DC ka East Khasi Hills ula pyntip ba ia mynta ki la dep ban aiti ia ka jaka haduh 70-75 % bad hapoh kane ka taiew kin sa lah ban tam sha ka 90%” bad shisien ba la dep ban aiti ia ka jaka kaba la kot sha ka 90%, kumta ka NHIDCL kan sa aiti noh ia kitei ki jaka sha ki kompani ba kin sdang noh mardor iaka kam” ong u Symbud Myntri Rangbah.
Ha kaba iadei bad ka Dainadubi-Darogre-Williamnagar Junction Road, u Bah Prestone ula ong ba katei ka projek kan sa sdang noh mardor hadien ba la pyndep iaka jingaiti ia ka jaka da ka tnad Forest na ka bynta ka Compensatory Afforestation. Hynrei ula pyntip ba ki trai jaka kin sa aiti noh ia ka jaka jongki ha ki katto katne ki bynta kumba 2.5 km haduh 3 km ha kaba iadei bad ka Tura-Dalu Road bad la bthah ia u Deputy Commissioner ka Tura ban pynsted ia ki kam kiba sahteng bad ki trai jaka bad ka District Council khnang ba yn lah ban shimti noh ia ki jaka.
