Ka Akashvani Music Concert hynnin ka sngi ka la wanrah lang ia ki nongput nongtem bad ki nongrwai kiba tbit na kylleng ka jylla Meghalaya bad ka la khring bha ia kito kiba sngewtynnad ia put ka tem bad ki sur jingrwai. Kane ka Akashvani Concert ka iahap bad ka jinglong tynrai jong ka Sngi Ioh Jinglaitluid ha ryngkat ka jingrakhe ia ka put ka tem bad ki sur jingrwai ba hiar pateng bad la pynlong ia ka da ka Akashvani Shillong ha ka U SoSo Tham Auditorium, Shillong ha kaba la wan iashim bynta da ki nongput nongtem bad ki nongrwai kiba la ai ia ki sur jingrwai jong ki shaphang ka jingieid ia ka ri bad kiwei kiwei ki jingrwai kaba la ktik ia ka jingieid ri ha kito kiba la wan peit bad sngap ia kane ka concert. Ka jingrwai Hindi ba sngewsih ‘Ae Mere Watan Ke Logo’ da ka Bateithymmai Nongrum ka la long ruh kum ka jingainguh ia kito kiba la aiti ia la ka jingim na ka bynta ka ri.
Ki nongput nongtem bad ki nongrwai kiba bun ki la wan pyni ia la ka sap ha kane ka concert. Kine ki kynthup ia ki jingrwai khasi da ka kynhun ba ialam da ka Balahpynhun Mawlong bad Kitkupar Nongsiej, ki jingrwai Jaintia da ka kynhun ba ialam da ka Kong Silbi Passah bad ki jingrwai Garo da ka kynhun ba ialam da u Gladborn Momin. U Bah Justine I Sun u la rwai ia ki jingrwai ba pawnam jong u bad ki nongsngap ki la sngewtynnad haduh katta ba ki la kyntu ia u ban bteng biang ia ki jingrwai. Ki nongsngap ki la sngewtynnad bha ruh ia ki jingrwai ba pawnam na kiwei kiwei ki bynta jong ka pyrthei ba la wanrah da ki kynhun ba ialam da u Bah Donboklang Dohling bad samla Gwyneth Alicia Mawlong.
U kongsan ha kane ka sngi, Air Marshal S P Dharkar, PVSM, AVSM Air Officer Commanding in Chief, Eastern Air Command ha ka jingai jingkren, u la iaroh ia ki jingpyrshang jong ka All India Radio, Shillong ban rakhe ia ka put ka tem bad ka Sngi Ioh Jinglaitluid lyngba kane ka prokram. U la ong ba ka put ka tem ka don ka bor kaba khraw ban ktah ia ki briew bad ba kane ka bor ka long ryntih ha baroh ki jait deitiri, ka ktien ka thylliej ne ka jinglong jingman ha kylleng ka pyrthei. U la ong, “Ka put ka tem kam don kano kano ka ktien kaba kyrpang, phi lah ban bud ia kano kano ka jait jingthoh ba la thoh ia ka lane phi lah ban kyntait ia kane, hynrei ki sur jingrwai ba sngewtynnad ki ktah beit ia ka mynsiem bad ki sah beit ha ka jingmut jingpyrkhat.”
U Dharkar u la kren ruh shaphang ki por ba la leit jong ka All India Radio. U la ong ba ka radio ka ju long ka tyllong ba heh tam jong ka jingpynbyrnia da kaba bynrap, “Ka ju long ka bynta kaba sngewtynnad bha jong ka jingim jong ngi, la ka dei na ka bynta ka jingpynbyrnia, la ka dei ban ioh khubor, la ka dei tang ban don ei ei hajan ha kano kano ka jaka ba ngi ju don.” U la ong, “Hynrei kaba kham kongsan shuh shuh, ka dei ka jingpynbyrnia ba ngi ju ioh lyngba ka Akashvani, lyngba ka radio, kaba ju iarap ban pynshemphang, ban pynsngewtynnad, ban pynkmen bad ka dei kaba ngi ju ap khmih lynti bha.” Ha kane ka concert la wan iashim bynta lang ruh da u Additional Director General (A & BO) (CO – Akashvani) NEZ, Akashvani bad Doordarshan, Ashish Bhatnagar bad kiwei kiwei ki ophisar jong ka tnad.
