Ka kynroh jong ka PA Sangma Sports Complex kaba dang shu dep tei shen ka la khyllem hynne ka sngi bad halor kane ka jingkhyllem na ka liang ka seng Trinamool Congress (TMC) ka la dawa ba dei ban thung da kynhun tohkit kaba laitluid ban tohkit halor katei ka jingkhyllem ka kynroh.
Katei ka kynroh kaba la khyllem ka dei kaba don hajan bad ka Sewage Treatment Plant bad Indoor Hall 2, kaba dang shu dep tei dang shen.
Halor katei ka jingjia, na ka liang jongka Director of Sports & Youth Affairs Kong Isawanda Laloo kala pynshai ba ka jingkhyllem jong katei ka kynroh kam shim la ktah pat ia kiwei pat ki jingtei kiba kongsan jong ka PA Sports Complex.
Ha ka kyrwoh khubor, ka Kong Isawanda kala pynpaw ba la dep bthah ia ka kompeni Hindustan Steelworks Construction Ltd (HSCL) kaba shna ia ka Sports Complex, ba kan aiti ia ka kaiphod kaba bniah halor katei ka jingjia bad kala pyntip ba na ka jingther u lapbah lapsan kala pynmih ia ka jinglang um bad kala pynshei ia ka nala kaba dona ha katei ka jaka, ia kaba la buh ban pyntuid ia ka um, ki jakhlia bad ki jaboh na ka STP Tank, Indoor Hall 1, Indoor Hall 2 bad ka Complex.
Ka Kong Isawanda ka la pynpaw ba namar ka jingtrei ia kine ki jingtei ka dei kaba dang iaid shakhmat, kumta ym pat lah ban shna pyndep lut iaka nala bad ka jingther u lapbah kala pynmih ia ka jinglang um kaba la pynlong syndon ia ka kynroh ban khyllem.
Kala pynshai ba katei ka kynroh kaba la khyllem ka dei kaba dang shu shna shipor ban iada na ka jingshah kyntur pud bad kala pynshai ba kiwei pat ki jingtei kim shym la shah ktah eiei na ka jingkhyllem katei ka kynroh.
Ia mynta ki dang ap ban ioh ia ka kaiphod kaba bniah halor katei ka jingjia na ka kompeni kaba pyntrei ia katei ka projek.
Ka la pyntip ba ki bor pyniaid District jongka West Garo Hills kila shim ia ki sienjam ban pynthikna ia ka jingshngain jong ki nongshong shnong ka thain bad la ai jingiarap ruh ia kawei ka longiing kaba la shah ktah na katei ka jingjia ha kaba la ai jaka sah, ka bam ka dih bad baroh ki jingdonkam.
Haba ia dei bad kane ka jingkhyllem ka kynroh, na ka liang ka Trinamool Congress (TMC) kala dawa ban thung ia ka kynhun tohkit kaba laitluid ban tohkit bniah ia ka jingkhyllem ka kynroh jongka PA Sangma Sports Complex bad ban Blacklist noh ia ka Badri Rai and Company (BRC), kaba pyntrei ia katei ka project.
U State Youth President ka TMC u Richard Marak ha ka kyrwoh khubor ula pynpaw ba ka kynhun tohkit kaba laitluid ka dei ban tohkit bniah, ban sei madan ia ka jingshisha baroh khamtam ha kaban leh eiei pyrshah ia kito kiba donbynta ha katei ka kam, wat lada donkam ban kynthup ia u Myntri bad u Myntri Rangbah ka jylla.
U Richard ula ong ba ka long kaba kongsan ban buh dak ïong noh ne Blacklist ia ka Badri Rai and Company (BRC) ban iashimbynta ha kino kino ki jingtei ia ki project kiban sa wan ha Jylla khnang ban lait na kum katei ka jingjia bad ka sorkar jylla ka dei ban pyni da ka kam ym tang da ki jingkular thylli, ban ioh biang ia ka jingshaniah na ki paidbah ka jylla.
Ula pynkynmaw ruh ba ka jingkhyllem jong ka kynroh ka PA Sangma Sports Complex kala jia la arsien bad kala pynmih ia ka jingkylli haduh katno la pyndonkam da ki tiar kiba bha ha ka jingtei ia katei ka Sports Complex.
