Ka Myntri Rangbahduh ka Ri Bangladesh, ka Sheikh Hasina hynne ka sngi ka la iehnoh kam bad phet jyndat na la ka Ri hapdeng ki jingiakhih ba jur pyrshah ia ka sorkar bad ka thmu ban leit sha London hynrei na ka jinglong jingman ha ka ri ka sah noh ha India. Hadien ba ka Sheikh Hasina ka la iehnoh kam bad phet na ka Ri, u heh shipai ka ri Bangladesh, u General Waker-Uz-Zaman ula pynbna ban thaw ia ka sorkar ba shipor bad ka tnat Inter-Services Public Relation (ISPR) ka la pyntip hynne ka janmiet ba u heh shipai un iakren ia ki nongialam ki samla pule bad ki nonghikai. Ka Sheikh Hasina ka la ai shithi iehnoh kam sha u President hynne ka janmiet bad ka la mih noh na ka Ri da ka helicopter shipai ryngkat ka para jong ka ka Sheikh Rehana. Hadien ba ka Hasina ka la phet ki shipai ki la shim ka jingkitkhlieh ban peitngor bad tehlakam ia ka jingkynad hapdeng ki samla pule pyrshah ia ka sorkar. Kham mynshwa ha ka por kumba 4 baje janmiet ha ka jingialang ha nongbah Dhaka, u heh shipai u General Waker-Uz-Zaman ula pynbna ba ka Sheikh Hasina ka la iehnoh kam bad mih noh na ka ri bad ula kam ba yn thaw ia ka sorkar shipor ban pyniaid ia ka Ri. U la ong ba ula shim ka jingkitkhlieh ban pynthikna na bynta ka jingbit jingbiang ki paidbah bad ula kyntu ia ki briew ba kim dei ban duh mynsiem bad ula kular ba baroh ki jingdawa jong ki yn pynurlong. Katkum ki khubor ba la ioh ka iathuh, ba ka Helicopter ba shong ka Sheikh Hasina ka la hiar ha kad liengsuin shipai ha Hindon hajan nongbah Delhi hynne ka sngi por janmiet bad u Air Officer Commanding (AOC) Sanjay Chopra ula pdiang sngewbha ia ka Sheikh Hasina ha katei ka kad liengsuin. Ki shipai ka India ryngkat ki bor pahara ki la buddien ia ka liengsuin ba shong ka Hasina naduh ba ka rung ha India haduh ba kan da hiar ha ktem shipai Air Force Station Hindon.
La iathuh ka Sheikh Hasina ka thmu ban shondur ha ka por ba ka kren shwa ba kan mih noh na ka ri hynrei kam shym la ioh lad satia. Namar da ki spah ngut ki nongïakhih ki la hiar thma ïa ka ïing sah ka Sheikh Hasina ha Ganabhaban bad ki khynra ïa ka jaka sah jong. La iohi ia ki samla pule ba iakhih kiba thiah ha ka jingthiah jong ka bad shim ia ki tiar, kumjuh ia ki blang ki rabit ha kper bad ki dohkha na ka pung ba heh ha katei ka jaka. Ha ka jingiakhih katto katne ki ïing ba don jingïadei bad ka seng Awami League bad ka Myntri Rangbahduh ka Sheikh Hasina kila shah thang. Ki paidbah ki la thang ïa ka Bangabandhu Bhaban, kaba la tip ruh kum ka Bangabandhu Memorial Museum ha Dhanmondi bad ka ophis jong u president ka Awami League bad ki la thang ruh ïa ka ophis jong ka Awami League ha Dhaka. Lah ban iohi ruh ha ki Social Media ba ki nongïakhih ki pynjulor ïa u mot jong u Nongseng ïa ka Bangladesh u Sheikh Mujibur Rahman, u kpa jong ka Sheikh Hasina bad ki pyrshang ban pynhap noh ïa u bad da ki hajar ngut ki paidbah ki la mih sha surok ka nongbah Dhaka bad thang ia ki kali hajan ka iing sah ka myntri rangbahduh, namar ba ki pulit kim lah shuh ban teh lakam ia ki paidbah kiba la ioh ban rung tuh.
Ha kajuh ka por, ka Hazrat Shahjalal International Airport kaba long kum ka khyrdop ba kongsan ka ri ka la khang khyrdep hynne ka sngi. U Capten Kamrul Islam bad u executive director, (HSIA) ula iathuh ba baroh ki jingtreikam ha katei ka kad liengsuin la khang shipor. Ki nongiakhih ki la pynjulor ruh ia ka iing sah jong u nongbishar ba ha khlieh duh. Katto katne ngut ki briew ki la kiew ia ka kynroh ka iing sah jong u nongbishar rangbah ha Hare Road No 19. U Prof Asif Nazrul ka Dhaka University hynne ka sngi, ula kyntu ia ki briew bad ki samla pule ba kin iaishah bad ban bat ia ka akor burom kum ki nongshong shnong ha Bangladesh bad u la pynthikna ba ki kam kam kin iaid shakhmat ban pynurlong ia ka jingangnud ki samla pule bad ki paidbah. Kawei ka tyllong khubor ka iathuh ba ka Sheikh Hasina ka thmu ban leit sha London ha UK, ong ki khubor. Ka jingiakhih ha Bangladesh ka la bthei phum na ki jingiakhih halor ka jingai bhah kam 30% ha ki kam sorkar na ka bynta ki khun ki ksiew jong ki nongialeh laitluid bad la pynduna 5 percent ha u bnai ba la dep hadien ka jingiakhih. Hynrei ki nongïakhih ki la sdang ban dawa ïa ka Sheikh Hasina ban iehnoh bad ka urlong mynta sngi 5 tarik Naitung,2024.
