Ka skul Tpep Pale Govt L.P School ba la seng ha u snem 1974 da ka dorbar shnong Tpep Pale da ka jingkyrshan lang u (L) Tylli Kyndiah MLA ka Jowai Constituency ha katei ka por, ki riew ryngbah ka shnong Tpep Pale, ha kane ka kynti ka la kynjoh sha u mawmer dap 50 snem ka jingiaid lynti ban shakri ban jingnang jingstad ia ki khynnah. Kumta na ka liang ka skul hynnin ka 30/04/24 ka la sdang ia ka jinglehkmen dap 50 snem bad la wan ban plie ia ka jinglehkmen da u Silvester Phanbuh, MCS, EAC West Jaiñtia Hills District uba long ruh kum u kongsan, ha ka jingdonlang ka D. Lathong, Block Mission Co-ordinator, Laskeiñ Block, West Jaiñtia Hills District kum ka symbud kongsan, ryngkat ka jingsakhi lang ki riew ryngbah, ki nongialam ka shnong Tpep Pale, ki khynnah skul, ki nonghikai bad kiwei. Ka phang jong kane ka jinglehkmen ka long “Golden Pass – Limitless Future” kaba mut ki 50 snem ba la leit ki long kum ki Mawlynnai bad ka lawei ban wan kan nang kham bha shuh shuh.
Katkum ka khana lyngkot ka skul ba la pynsngew da ka S.Pakma head teacher ka ong, ba ha ka jingiaid lynti ka skul ka la ioh bun ki jingiarap na ka sorkar kum ka Midday Meal skhim, ka jingiarap pynioh ei ki kot, ki uniform nangta ki school grand, teacher grand bad kiwei. Ka iathuh ruh ba da ka jingtrei shitom ki nonghikai kumjuh da baroh kiba don bynta, kane ka skul ka la ioh ruh ia ka nam kum ka PM SHRI School bad mynta la tip ia ka kum ka PM SHRI Tpep Pale Govt L.P School Jowai. Shuh shuh ka skul ka la shim bynta ruh ha kiba bun ki prokram sorkar la ha ka jingiadei bad ki prokram pynshai paidbah ki jait jingialehkai sports, bad ka la juh ioh rah nam ruh ha ki jait jingiakop bapher bapher. Ka symbud kongsan haba kren ka la ai nuksa ia ki skul bapher ba ka lap ha ka jingiaid lynti kum ka Block Mission Co-ordinator, bad ka iaroh ruh ia ka jingtrei shitom ki bor pyniaid kane ka skul khamtam ba ka la ioh ia ka kyrdan PM SHRI School kaba long ka burom jong ka skul hi baroh kawei.
Ka kyntu ruh ia ki nonghikai bad kin long kiba aiti ha ka kam naduh mynsiem namar na ka por shaka por lah ban mih ki kyndon ki aiñ bapher kiba ia dei bad ka pule puthi ki bym lah ban kiar wat la hap mad ia ki jingeh. U kongsan Silvester Phanbuh MCS EAC West Jaiñtia u ong, ka lawei jong ka skul Tpep Pale ka dei ruh ka bynta jong ka lawei ka Jylla, namar la da kiew ka skul, yn sa kiew lang ka shnong, ka district bad ka Jylla.
Kumta u kyntu ia ki nonghikai ban peit bniah ruh ia ka sap ki khynnah khnang ba kin ioh ia ka lawei ba bha.
Te kumba 50 snem ka la iaid lynti kane ka skul u khmih lynti ruh ba ha ki 50 snem shakhmat kin long ki jingkyrkhu. Kiwei pat ba ai jingkren kynthup u D.Pohchen Ex Secretary SMC, na ka dkhot SMC ba mynta ka Wan Toi, na ka Dr F.Rymbai kaba juh pule ha kane ka skul, na ka B Kyndiah Chairperson Golden Jubilee celebration, na u S.Langshiang Secretary Golden Jubilee celebration bad kiwei ha ka jingialang ba pyniaid da u R.S.Teron Headmaster.
