U Bah Bindo Mawthew Lanong ula ong, ka jingpyntreikam ka sorkar India ia lai tylli ki ain thymmai ka Bharatiya Nyaya Sanhita (BNS), Bharatiya Nagarik Suraksha Sanhita (BNSS) bad ka Bharatiya Sakshya Adhiniyam (BSA), ha jaka ka Indian Penal Code 1860, Criminal Procedure Code 1973 bad ka Indian Evidence Act 1872 , kan ktah ia ka synshar bad bishar ha ki District Council Court, ki iing bishar ki hima, elaka bad ki shnong kiba ju bishar ia ki mukotduma baroh shikatta da ki ain barim.
Haba wanrah ia ka mat iatai hapoh ka iing dorbar hynne ka sngi, u Bah Lanong MDC shu sieh ula pynpaw ka jingsngewkhia ba ka sorkar India ka lah leh kyrkieh ban pyntreikam ia kine ki ain khlem ka jingiathir iatai sani bad bun ki paidbah ki pyrshah ia kane jingpyntreikam syndet ka sorkar India ia kine ki ain bad wat ki nongbishar ruh ki pyrshah halor kane.
Ula ong kine ki ain thymmai ym tang ba ki ktah ia ka District Council Court bad kham sngewtieng shuh shuh ka long ia ki hima, ki elaka bad ki shnong, namar katkum ka Sixth Scheduled, ka Council ka don la ka jong ka iing bishar nadud ka District, Hima haduh ki shnong ban bishar ha ki kam ki trai shnong halor ki mukotduma bapher bapher.
“Ka jingdon ki iingbishar ha ki hima, sirdarship bad ki shnong ka iarap shibun ia ki paidbah ha ki thain kyndong ban pyndep ia kam bishar ha ka jinglut kaba duna, hynrei kine ki ain thymmai ki lah ban ktah ia ka synshar bishar trai ri kaba ju leh baroh shikata haba don ki mukotduma” la ong u bah Bindo bad ula bynrap ba ki kyndon treikam ha kine ain la pynkylla baroh ka IPC ka don 511 ki kyndon katba ka BNS kaba thymmai ka don tang 388 ki kyndon bad kumjuh kiwei ain thymmai.
U la ong ka Bar Council of India ruh ka pyrshah ia kane hynrei ka kyntu ia ki paidbah ban long jai jai namar kan leit ujor sha iingbishar Suprem Court. Kumta iing baroh kawei ka dei ban pyrshah halor kane bad ban ai jingthoh sha ka sorkar India.
Haba shim bynta u nongialam ka liang iatei u bah TW Chyne ula ong, ka jingpynkylla ia kitei ki ain naduh ki por phareng kan ktah ia ki iing bishar ka Council bad khamtam ia ki hima, ki sirdarship kiba long iing bishar trai shnong.
U la kyntu ia ka iing ban thaw da ka committee ban pyrkhat bha ban kyntu ia ka sorkar India.
U Dy CEM u bah PN SYiem ula ong, ka jingpyntreikam ka sorkar India ia kitei ki ain thymmai ka wanrah ka jingkulmar ia ka Council bad ia baroh kiba ju pyntreikam ia ki ain barim kum ka IPC, CrPC bad IEA naduh u snem 1953 bad kine ki don ruh ha ka Sixth Scheduled, kumta ban pyntreikam ia kitei ki ain thymmai ban pynkylla ia ka Sixth Scheduled ban lait ka jingkulmar.
Ula ong ka Executive Committee kan sa shong pyrkhat kumno ban leh namar ka sngewkhia ia kane ka jingpyntreikam kyndit ka sorkar India ia kitei lai tylli ki ain thymmai.
Kum ban pynpaw sorkar India ka la pyntreikam ia kine ain ha ka ri naduh ka 1 tarik Naitung, 2024.
