Ka Directorate of Information and Public Relations (DIPR) ha ka sien banyngkong ka la pynlong ia ka Meghalaya Media Meet 2024 ha Taj Vivanta, Shillong bad ha kane ka jingialang la pynkup burom ia ki 8 ngut ki nongthoh khubor ka jylla. Ia kane ka jingialang la plie da u Myntri Rangbah ka Jylla u Conrad K Sangma kum u kongsan ha kaba la iadonlang ka Myntri ka tnad Information & Public Relations ka Dr Mazel Ampareen Lyngdoh kum ka kongsan symbud, u Commissioner & Secretary ka tnad I&PR u Vijay Mantri bad u Director ka tnad I&PR u Malthus Sangma, ki nongthoh bad nongpathai khubor na kylleng ka jylla Meghalaya. U Myntri Rangbah ula ong, ka sorkar ka sngew donkam ban pynlong ia ki prokram ban ai jingithuh bad ban pynkup burom ia ka jingtrei shitom ki nongthoh khubor, ban iakynduh bad ban iatai ia ka lynti kaba dei ban iaid shakhmat na ka bynta ka bha ka miat ki nongpathai khubor khnang ba kan lah kan nangkiew shakhmat katkum ia ki kyndon bad kumjuh ban lah ban iaid katkum ka jingkylla jong ki kor teknoloji.
U la bynrap ka kam thoh khubor kam kut tang ban shu thoh bad donkam ban pdiang ia ka jingkylla katkum ki kor ki bor teknoloji ka juk mynta bad donkam ban pynthymmai ha ki bynta bapher ha ka kam thoh khubor, ka jingioh jinghikai ba man ka por bad ki jingleit ialam kylleng ia ki nongthoh khubor bad ula ban jur donkam ka jingkynthoh ba bha na bynta ka imlang sahlang ha ka synshar paidbah.“Ngi lah ban pynlong ïa kiei kiei ba sngewtynnad tang shipor hynrei ban pynneh ïa ka jingshaniah ka long kaba donkam ban don ia ka thong katba ngi nang ïaid shakhmat bad nga ngeit skhem ba ka jingshaniah ka dei ka bynta ba kongsan tam ha ka kam pathai khubor. Haba ngi nang iaid shakhmat, ngi khmih lynti ia ki jingkynthoh ki jong phi kiba tei ia ka jylla bad ngin iatreilang na ka bynta ka bha ka miat ka imlang sahlang baroh kawei” la ong u Myntri Rangbah. Ula pynthikna ruh ia ki lad pathai khubor, ba ka sorkar kan sa peit bniah ia ki katto katne ki mat kiba iadei bad ka bha ka miat kiba la pynpaw da ki nongpathai khubor jong ka jylla.
Ha kane ka jingialang la pynkup burom ia ki 8 ngut ki nongthoh khubor ba la treikam ha ka kam thoh khubor, kynthup u Bah P Marwein, Editor jong ka Youth Today, u Subroto Bhattacharjee u Bureau Chief ka UNI, Bah R.M Shabong, u Editor U Rupang, Bah MM Thaiang, Editor jong U Yutip, u Manas Choudhury, Editor barim The Shillong Times, u Sanat Chakraborty, u Independent Journalist, ka Linda Chhakchhuak, ka Independent Journalist bad u Sanjib Bhattacharjee, u nongshong dur ka kot khubor The Shillong Times. U Myntri Rangbah ula pynbna ha ka jingialang ban ai mar T.1 Lak na ka CMSG ia ki 8 ngut ki nongthoh khubor ba la shah pynkup burom.
