Ka kynhun ki Local Truck Owners and Drivers Association mynta ka sngi ki la pyntip ba ki kali kiba kit maw kit shyiap hapoh ka jylla, ki lah ban kamai khlem ka Challan.U President ka kynhun u bah Egenstar ula iathuh ba u Myntri Rangbah ka jylla hynne ka step ka 22 tarik Nailar ula khot ia ka kynhun ban iakren ban pynbeit ia ki jingeh ba ki iakynduh. Haba kren mynta ka sngi sha ki lad pathai khubor u President ka kynhun u bah Egenstar Kurkalang ula ong ba ha katei ka jingiakynduh ia u Myntri Rangbah, ka kynhun ka la aiti ruh ia ki dorkhas ban kyrpad ban kyrpad na ki katto katne ki kyndon jong ka MMMCR Act.
“Katba ka sorkar kan dang pynkhreh ban wanrah ia ka jingpynkylla ha kaba ia dei bad ka Meghalaya Minor Minerals Concession Rule (MMMCR),ngin iaid bad ngin bud katkum ka kyndon`,”ula ong. Ula ong ba ha kane ka jingiakren u Myntri rangbah ka jylla, u la kular ba ka sorkar kan sa wanrah ia ka jingpynkylla ia ka MMMCR ban ialad ia kiba tihmaw tih shyiap da kaba rim khlem da pyndonkam ia ki mashin, ha ka juh ka por ka sorkar kan wanrah ia ka jingpynkylla ia k MMMCR.
U la ong ba kam kynhun ka la ai jingmut ba ka jingshah ban tihmaw tih shyiap tang ha ka ne ka jylla , kam dei ban long ha ki tyllong um ne ki kner surok ban pynjot ia ka surok.U bah Egenstar ula pyntip ba baroh ki kali kiba kit maw kit shyiap kiba pynhap tang na shnong ha shnong, na kawei ka District sha kawei ka district bad hapoh ka nongbah jylla, kim donkam shuh ban iaid da ka challan laiit noh tang ia kiwei kiba leit ban leit maw shyiap shabar ka jylla ki donkam ia ka Challan. Ha kajuh ka pir, ula pynkynmaw ba la bunsien ki la pynsngew sha ka sorkar ban wanrah da ka lynti ba biang haba iadei bad ka jingtih maw tih shyiap ha kane ka jylla.
