Ki khynnah ki donkam ban bam 5 jait ki jingbam tei met man ka sngi

Ka tnad Central Bureau of Communication (CBC), ka Tnat Information and Broadcasting ka Sorkar India, Regional Office, (MT Region), Shillong ka la pynlong ia ka jingpyninam ia ki dur ba ar sngi bad ban ai jingai jingtip ia ki nongialeh laitluid ka thain shatei lammihngi bad ka bam kaba tei ha Ramakrishna Mission Higher Secondary School, Mylliem. Ha kane ka tamasa pynidur ia ki jingialeh laitluid jong ka Ri India lyngba ka jingpyni ia ki dur. Ka jingai jingtip ban kyntiew ia ka bam kaba tei bad pyni ia ki sienjam jong ka sorkar ban iakhun ia ka jingduna ka bam kaba tei da kaba kyntiew ia ki rukom bam kiba tei. Ka DHEO, East Khasi Hills, ka Kong O Summer haba ai jingkren ka la batai sani shaphang ka bam tynrai na ka bynta ka jingtei ia ka met, ka jingsan ka jabieng bad ka jingiakhun ia ka jingduna snam (anaemia). Ka la ban jur halor ka jingdonkam ban kyntiew ia ki jingtei met bad ka jingbam kaba bha.

Ka la pynshai ruh halor ka jingiadei jong ka bam bad ki jingpang bapher bapher bad ka rukom bam kaba dei. Ka la pynshlur bad ai mynsien ia ki khynnah pule ban dih shisien shi taiew ia u dawai ‘Folic Acid’ bad ia u dawai ‘Albendazolearsien’ ha ka shisnem khnang ban pynduh jait ia ka jingduna snam.  Ka Kong Icydora Nongrum, Principal jong ka skul ka la pynpaw ka jingsngewnguh ia ka CBC, Shillong kaba la pynlong ia ka jingpyni nam ia ki dur bad ka ong, ba kane kan iarap ban ai jinghikai ia ki briew bad khamtam ki khynnah pule, shaphang ka jinglen lade kaba khraw jong ki Nongiakhun ban laitluid na ka bynta ka Ri. Ka la ong lyngba ki dur ba la buh ha kane ka jingpyninam ki khynnah pule ki ioh jingtip shaphang ki riewshlur ki bym shym la paw pyrthei jong ka thain shatei lammihngi kiba la noh synniang sha ka jingiakhun ban laitluid ka ri.

Haba kren shaphang ka bam kaba tei, ka la kyntu ia baroh ki khynnah pule ban pynneh ia ka rukom bam kaba ryntih bad ban pynthikna ba kin bam kumba 5 jait ha ka shisngi kynthup ia ka carbohydrate, ki protein, ki shana dai, ki jingbam ba shna na ka dud, ki jhur jyrngam. La pynlong ia ki jingiakop bapher bapher hapdeng ki khynnah pule jong ka skul ha kane ka prokram ba ar sngi. La sakhi ruh ia ka jingiashim bynta shitrhem ha ka jingiakop rwai, kwis, bad ka jingdro dur. La sam ia ki khusnam sha ki nongjop ha ka jingialang pynkut ba la pynlong mynta ka sngi.