U Lat ka jylla Meghalaya u CH Vijayshankar ha ka sngi Sait jain u la plie ia ka Shillong Book Fair ba ar, kaba la pynlong da ka National Book Trust, India ha nongbah Shillong. Ha kane ka sngi la iadonlang u Principal Secretary ka tnad Arts & Culture u Bah F.R. Kharkongor, Yuvraj Malik, Director National Book Trust India, u Swapnil Tembe u Director ka tnad pule puthi, u DD Shira, Director, ka Arts & Culture bad kiwei kiwei. Kane ka Book Fair kaba 9 sngi kan kut ha ka 13 tarik u Risaw ha ka phyllaw jong ka State Central Library, Shillong. U Lat ka jylla ula pynpaw ba kane ka tamasa ka long ka jingai jingtip kaban long ka jingmyntoi ia ki samla ka nongbah Shillong.
Haba kren ha ka jingialang u Bah F.R. Kharkongor, ula iaroh ia ki paidbah kiba la mih hapdeng ka jingbym ailad ka suin bneng bad kane ka jingwan iashim bynta ka jong ki ka pyni ba ki dei kiba kwah ia ki kot bad ula ai khublei ia ka National Book Trust India kaba la jied ia ka nongbah Shillong kum ka jaka ban pynlong ia ka iew die kot ne Book Fair mynta u snem. Katba u Yuvraj Malik, ula ong ba ki kot ki dei shibynta jong kano kano ka jingiaid shakhmat jong ka jaidbynriew bad ula kyntu ia ki khynnah ba ki dei ki nongkit tien syiem bad kum ka lawei jong ka pateng, kin sa kylla long ki heh ki haiñ ha ki snem ki ban wan da ka bor jong ka jingdon ia ka jingstad lada ki kynthup ia ka jingpule kot ha ka jingim kaba man la ka sngi.
Wat la ka jingplie ia ka Book Fair ka la long hapdeng ka jingjur slap hynrei ki la don palat 300 ngut na palat 10 tylli ki skul ha ka nongbah kiba la wan iashim bynta ha kane ka Book Fair bad ha kane ka sngi la pynlong ruh ia ka jingiakob dro dur bad ka jingai jingkren halor ka mat Rashtriya e-Pustakalaya bad la pynbyrngia ruh da ki jingrwai bad jingshad na ki kynhun bapher.
