Ka District Sankalp-Hub for Women Empowerment lyngba ka ophis jong ka District Social Welfare Officer (DSWO), Nongstoin, ha ryngkat ka jingiatreilang bad ka ophis District Programme Officer (ICDS), West Khasi Hills (WKH) ka la pynlong ia ka jingrakhe ia ka International Day of the Girl Child 2024 ha Leonel Futsal Arena, Pyndengrei. Ha kane ka prokram, i kong Nylla Wanniang, Extra Assistant Commissioner, West Khasi Hills District i la wan ban iashim bynta kum ka Kongsan ha ryngkat ka jingiadonlang i kong D. Pakyntein, District Social Welfare Officer,Nongstoin, ka District Medical and Health Officer (DM&HO) kong E. Tariang, u District Coordinator jong ka Sankalp-Hub for Empowerment bad kiwei pat.
Ka phang jong katei ka jingrakhe ka dei , “Girl Vision for the future,” kaba maitphang ia ka jingangnud jong ki khynnah kynthei bad ka bynta jong ki ban tei ia ka imlang sahlang ha ki sngi ki ban wan. Haba kren kum i Kongsan, I kong N. Wanniang i la maitphang halor ka jingkiew ki kynthei ha kiba bun ki bynta, khamtam ha ka sorkar, ha kaba kiba bun ki kynthei ki la kiew ban long ki nongialam ha ka district, ka jylla bad ha ka ri baroh kawei. Ka la pynpaw ia ka jingkyrmen ba da ka jingkyrshan jong ki skhim sorkar bapher bapher bad da ka jingiatreilang ka imlang sahlang, ki kynthei kin dang kiew shaphrang ban long ki nongialam ha ka imlang sahlang bad ha ka sain pyrthei ruh.
Ka la pynshlur ia ki khynnah kynthei kiba la don bynta ha katei ka jingialang, da kaba ong ba ka pule puthi ka long kaba donkam eh namar ka pynioh bor ia ki ban tip ia ki hok jong ki bad ban iada ia lade, kaba pynneh ia ka jinglaitluid bad jingshngain jong ki. Ha katei ka sngi la pynshit pynsngaiñ ruh ia ka jingialang da ki jingrwai bad jingshad bad la pynkut ruh ia katei ka prokram da ka jingialehkai Final Futsal hapdeng ki khynnah kynthei jong ka skul Sibsing Memorial Govt. Higher Secondary School pyrshah ia ka St. Xavier Secondary School ha kaba ka Sibsing Memorial ka la ioh ban khur ia ka nam jop ha katei ka jingialehkai.
