Kum shibynta ban rakhe ïa kane ka sngi Ka 5 tarik u Nailur kaba la tip ruh kum ka sngi pyndon burom ïa ki Nonghikai “Teachers Day” na ka liang ka Ophis Jong ka District School Education Ophisar, Ri bhoi District ka la ïoh ban rakhe kyrpang ïa kane ka sngi da kaba pynlong ïa ka program na ka bynta ki Nonghikai ha Parish Hall, Nongpoh. Ïa kane ka sngi la rakhe ruh ha kylleng jong ka ri ban kynmaw burom ïa ka sngi kha u Dr. Sarvepalli Radhakrishnan, uba dei ruh u President President barim jong ka ri bad uba la ïoh ruh ïa ka khusnam Bharat Ratna award bad dei halor kane ka nongrim ka ri baroh kawei ka kynmaw burom ïa kane ka sngi kha Jong u da kaba leh donburom kyrpang ïa baroh ki Nonghikai skul hapoh ka ri. Haba ïadei bad kane ka sngi ka Ophis jong ka District School Education Ophisar, Ribhoi District ka la rakhe ïa kane ka sngi da kaba khot ïaki ki skul kiba napoh ka them Ri Bhoi District ban ïa shim bynta lang ha kane ka sngi pyndon burom ïaki Nonghikai Skul lyngba kashad ka Mastih ka rwai ka siaw ka put ka tem bad kiwei kiwei de bad lyngba kane ka jingïashim bynta daki khynnah skul ka la wan rah ruh ïaka dur phuh samrkhie jong ki Nonghikai hakaba ka la pynkmen ruh ïaki Nonghikai bad kiwei kiwei de kiba wan ban sakhi lang hapoh Jong ka Parish Hall.
Ha kawei pat ka bynta jong katei ka program la ïoh ban sam ïaki khusnam sha ki nonghikai ha ka district kiba la shah jied halor u synñiang ba ki la noh sha ka pule ka puthi bad khamtam ban kyntiew ïaka jingnang jingstad ba kynthup ïa u Sukanta Bhattacharjee Assistant Teacher ka St. Michael’s Higher Secondary School Umsning ha ka Secondary Level, ka kong Ristrolian Nongrum Assistant Teacher ka Nehru Memorial Secondary School Umsning ha ka Upper Primary Level, ka Mary Magdalin Lamo Assistant Teacher ka St. Jude LP School Umpher Byrnihat, ka Varsha Sharma kum ka Best Lady Scout Master na Little Star Secondary School Baridua bad ka Manosha Kalwing kum ka Best Guide Captain na St Paul’s Higher Secondary School Nongpoh. Ha katei ka sngi la wan ban ïa donlang da u Bah Sosthenes Sohtun, MLA ka Jirang Konstituensi kum u kongsan ha ka jingïadonlang u Deputy Commissioner ka Ri Bhoi u Abhilash Baranwal kum u Symbud kongsan, Ruby Das, District School Education Ophisar, Ri Bhoi District, Ki nonghikai, ki khynnah skul lem bad kiwei kiwei.
U Bah Sosthenes Sohtun kum u kongsan u la ai khublei kyrpang ïa ka tnad pule puthi Jong ka District ba ki la pynlong ïa kane ka prokram ban pyndon burom ïa kane ka sngi Teachers Day kyrpang na ka bynta ki Nonghikai skul Jong ka them Ribhoi. U la ai khublei kyrpang ruh naka bynta baroh ki Nonghikai kiba la ai ïa ka jingshakri da kaba rai kut ban pynleit jingmut bha ha ka kam hikai ba kumno yn nang pynwan dur ïa ki khynnah skul. U la ong ruh, baroh ki Nonghikai ki don hok ban ïoh ïa kane ka jingkynmaw burom ïa ki kam Jong ki kum ki Nonghikai hapoh ki kamra klas namar dei lyngba ki jingnang jingstad Jong ki ban ai jinghikai kaba lah ban pynlong ïaki khynnah skul kiba stad bad kiba shemphang. Khatduh, u Bah Sohtun u la kitbok kitwriang ïa baroh ki Nonghikai ba kin nang ïai bteng ban sam ïaka jingnang jingstad sha ki khynnah skul lyngba ki kam hikai Jong ki dakaba buh ruh ïaka thong ban nang pyn janai shuh shuh ialade khnang ba kin lah ruh ban ai ïaka jingshakri kaba bha tam naka bynta ki khynnah skul.
