Ka jingthep vote ilekshon Lok Sabha ha ka Ri kynthup ka jylla Meghalaya ka la sdang mynta ka sngi thohdieng na ki hynniew wat ka jingthep vote ha Ri India ka ban kut ha ka 1 tarik Jylliew, 2024. Katkum ka jingiathuh u Chief Election Officer ka jingthep vote ha jylla Meghalaya mynta ka sngi, ka long kaba iaid beit ha kylleng ka jylla bad ki paidbah ki la mih haduh 74 % ban pyndep ia ka hok jong ki ban jied nongmihkhmat sha ka iing dorbar Lok Sabha.
Ka Jylla ka la sakhi ia ka jingiamih ryntih jong ki paidbah ban thep vote bad ka jingpoi ki nongthep vote ha Shillong ka long 72% bad ha Tura 78 % haduh ba thoh ia kane ka khubor, bad kane ka pynpaw ba ka jingpoi ki nongthep Vote MP 2024 ka kham bun ban ha ka ilekshon MP 2019. U CEO ula iathuh ba ka jingkhein ba bniah yn sa ioh mynta ka miet bad ula ong ba ym pat ioh lut ia ka jingkhein namar ba haduh ba kut ka por thep vote ruh ki dang don ki jaka ba dang thep Vote namar ki briew ki la don lypa ha u lain kiba hap hapoh jong ka Shillong Parliamentary constituency.
Haba phai sha ka 2-Tura (ST) Parliamentary Konstitwensi la ong ba ka la don ka jingthud ha ka network bad khmih lynti ba yn da ki la poi sha ki jaka ba biang ka Network ka jingkhein kan sa kiew la khmih lynti ba kan long kumta ynda la ioh lut ia ka jingkhein. Haba ia dei bad ki jaka buh ia ki ia ki kor thep vote EVM, na ka bynta ka 1-Shillong (ST) Parliamtnary Konstitwensi ki don 8 tylli ki jaka hynniew tylli ha ki District bad kawei ha Sohra Civil Sub Division, katba ka 2-Tura (ST) Parliamentary Konstitwensi ki don san tylli ha ki san tylli ki District.
U Chief Electoral Officer ka jylla u Dr. BDR Tiwari la iathuh ba ka elekshon ban jied ia ki MP sha Lok Sabha kaba 18 ka la iaid beit bad khlem don kano kano ka huri hura na kane ka bynta jong ka jylla.
+ There are no comments
Add yours