Ka jingtohkit ki pulit ka la iaid shaid shaid ban Chargesheet ia ki shipai Border Security Force (BSF) ba shah kynnoh thombor ia kawei ka longiing kynthup ïa ka khynnah ba dang 15 snem bad ki lah ban shah kem ha u bnai ban wan. Ia kane la pyntip da u Symbud Myntri Rangbah ba khmih ïa ka tnat kam pohing (Police) haba jubab ia ka Call Attention ba wanrah da u MLA ka VPP na Mawlai u Bah Brightstarwell Marngbaniang halor ki sien jam ba ka Sorkar ka shim pyrshah ia ki BSF ba thombor ia kawei ka longiing ha Kuliang, East Jaintia Hills District.
U Bah Prestone ula pyntip na ka Liang ki Pulit tang marsien ioh pdiang ïa ka ejahar (FIR) pyrshah ia ki BSF ki la pynlong ïa ka jingtohkit kynthup ban eksamin ia ka iing ba shah kynnoh shah shoh ha ki shipai bad ha kajuh ka por ki leit sha ka iing ban lum ia ki sakhi sabut.U la pyntip ba ïa ka ejahar la ujor da ka kmie jong ka khynnah ba dang 15 snem, ka Kong Martina Pohshna pyrshah ia ki BSF da kaba kynnoh ba ki la jrong kti ïa ka khun bad ki la shoh ia u kurim jong ka.
“Ki Pulit ki la Register ia ka Case ha Khliehriat Women Police Station hapoh ka kyndon 457,236,354,384 bad 34 jong ka Indian Penal Code, ba pule lang bad ka kyndon 7 bad 8 jong ka POCSO Act” la ong u Bah Prestone.Nalor kane u Bah Prestone u la pyntip na ka liang ka Sorkar Jylla ka la thaw ia ka Co-ordination Committee ban khlieh da ki DC lane ki SDO (Civil) ha ka jingdonlang ki OC jong ki Thanat, ki Rangbah Shnong ba don ha ki thain khappud bad ki BSF.“Ka thong jong ka Co-ordination Committee ka dei ban wanrah ka jingiatreilang hapdeng ki paidbah bad ki BSF ha ki thain khappud” u la ong.
