Ki shipai ki dei ban long kiba khlain ka bor met bad bor pyrkhat: ADG-BSF

U Additional Director General BSF (Eastern Command), Kolkata, u Ravi Gandhi, ula wan jngoh ban tip ka rukom treikam ki shipai BSF ba pahara ha khappud ka Meghalaya bad ka Bangladesh. Katkum ka kyrwoh na ki BSF, ki la pyntip ha kane ka jingwan jngoh ba 2 sngi jong u ADG ha ka 15 bad 16 tarik u Lber, ula lum jingialang ban tip halor ka jinglong jingman bad ka jingpynlong ia ki kam khynra ha ka thaiñ khappud. 

U IG BSF Meghalaya u Harbax Singh Dhillon ryngkat bad ki heh ophisar ka BSF ki la pdiang sngewbha ia u ADG BSF bad ki la pynsngew ha u ia ka jinglong jingman ha ki thaiñ khappud bad ka Bangladesh bad ia ki jingeh ba ki shipai ki mad ban pahar ha khappud bad ia ki lad ki buit ba ki la shim ban iakhun ia ki jingeh baroh. Ha ka 15 tarik u Lber, u ADG ryngkat ka jingdonlang u IG BSF Meghalaya, ki la leit ban khmih bniah ia ka rukom pyniaid kam bad ka jingpynkhreh lypa jong ka Sector Headquarter Tura bad u ADG ula iakren ia ki shipai BSF ha kaba ula ban jur ia ka jingdonkam ki shipai ba kin long kiba khlain ha ka bor met bad ha ka bor pyrkhat.

U ADG u la leit ruh ban iakynduh ia u Lat ka Jylla Meghalaya u Phagu Chauhan ha Raj Bhavan, ia u Chief Secretary ka jylla u Bah DP. Wahlang bad ia u DGP ka jylla u Dr. L.R. Bishnoi. Hynne ka sngi, u ADG ryngkat bad u IG BSF Meghalaya ki la leit jurip ia ka jingtei ia ka Composite Hospital Mawpat bad ki la leit ruh ban jurip ia ka BOP Dawki, Pyrdiwah bad Lyngkhat bad une u heh BSF ula iakren ruh bad ki Field Commander bad ki shipai BSF ha kaba ula iaroh ia ka jingtrei shitom jong ki ban iada ia ka Ri bad ia ki khappud jong ka jylla Meghalaya.