Ki khynnah pule kiba pass bha ia ka eksam Higher Secondary School Leaving Certificate (HSSLC) mynta ka la sngi ki la pynpaw ia ka jingkmen ba khraw ba ki la ioh ban kheit ia u soh ka jingjop. Haba kren sha ki lad pathai khubor, ka samla Ferry Filarisha Wann na ka skul St Marys Higher Seconadary School ka la pynpaw ia ka jingkmen bad ka jingsngew nguh namar ba ka khlem poi pyrkhat ban ioh ia ka kyrdan ba halor hynrei namar ka jingtrei shitom bad ka jingkyrshan ba ka ioh na ki nonghikai bad ki kmie ki kpa, ka la lah ban poi sha ka thong. Ka samla Ferry ka la iathuh haba ka pule kot ka ju pynleit jingmut beit thik ha ka kot bad kam ju ai ailad ba ki social Media kan pynthut ia ka jingmut jingpyrkhat ka pule puthi jong ka. “Ki Social Media ka dei ka nongshun bah ia ki khynnah pule bad ka pynthut palat ia ka pule puthi. Hynrei ngi dei ban kynmaw ba ngi dei ban buh shwa ia ka jingpule hakhmat,” ong ka samla Filarisha.
Kane ka samla ka la ong ba don ia ka jingthmu ba kan bteng ia ka jingleit pule ia ka B.Com bad ha kajuh ka por kan pynkhreh lang ruh ia kiwei ki Competitive eksam. Ha kajuh ka por, u Sohan Battarcharjee uba la ioh ia ka kyrdan ba nyngkong ha ka Science, ula pynpaw ia ka jingsngewkmen bad ka jingsngewkyndit namar ba um shym la khmih lynti ban ioh ia ka kyrdan ba nyngkong. Ula ai khublei ia baroh ki nonghikai kiba la iarap haba u don kano kano ka jingeh ne ka jingartatien haba u pule kot. Katba u Pongkoch Dutta uba ioh ia ka kyrdan ba lai ha ka Commerce, ula ong ban ioh ia kane ka kyrdan kam long kaba eh lada don ka jingkut jingmut ba shisha.
Na ka liang ka principal jong ka Laban Bengali Boys ka Jona Ghoswami, ka la ong ba ka jinglah kane ka skul ban ioh ia ka resol babha ka dei namar ka jingkyrkhu u Blei bad ka jingtrei shitom. “Ka Laban Bengali boys ka la lah ban poi sha kane ka thong ka dei namar ka jingiatrei lang ki khynnah bad ki nonghikai, “ ka la ong. Ka la bynrap ban ioh ia ka resol ba bha ym lah ban trei shimet ne marwei hynrei donkam ia ka jingiatreilang jong baroh ki nonghikai. Ha kajuh ka por ka la ai khublei ia ki khynnah bad ki nonghikai kiba la trei shitom. Katba ka Principal jong ka St. Marys College ka Sister Sonia Chacko, ka la ai khublei ia baroh ki khynnah kiba la wanrah ia ka resol babha bad kiba la wanrah nam burom ia ka skul. Ka la ai khublei ia ki kmie ki kpa bad ki nonghikai baroh kiba la ai ka jingkyrshan ia ki khynnah ha ka jingpule jong ki.
