U Dr Anchal Gulati ula ong, ka long kaba kongsan ia ka jylla Meghalaya ba don ia la ka Medical College namar haduh mynta ka Meghalaya ka don tang kawei ka Medical College ha NEIGRIHMS.
U Dr Gulati ula kren ia kane ha ka Orentation Programme ba pynlong da ka Tnad Health & Family Welfare ha Hotel Marriot Shillong hynne ka sngi na bynta ki Specialist Doctor ba la ithuh ki ban ai jinghikai ha ka Shillong Medical College.
U Dr Achal Gulati ula ong, kumba long mynta ki don 706 tylli ki Medical College ha ka ri bad ka Meghalaya ka don kawei ka Medical College kaba dei ka NEIGRIHMS kumta ka donkam ban tei ia ka Medical College ha Meghalaya.
“Ka jylla ka donkam 300 haduh 400 tylli ki Seat man u snem, hynrei ia mynta ka jylla ka don tang 50 tylli ki Seat” ong u Dr Gulati bad ula bynrap ban seng Medical College ba thymmai donkam ban ioh ka jingkyrshan ba Pura na ki doctor khnang ba yn lah ban pynurlong ia katei ka thong.
“Ka jylla ka dei ban iaid shakhmat katkum ka jingiaid ka por bad ka jingkiew sted ka roi ka par bad ka dei ban don la ka jing ka Medical College. Ngi donkam ban ai ka lad ia ki samla pule ba kin kylla long ki Doctor ha ka jylla” ong u Dr Achal.
Ka jingthmu jong katei ka Orientation Program ka long ban ai jingpynshai halor ki kamram bad ki jingkitkhlieh hapoh jong ka Medical College bad Hospital khamtam eh bad kito ki ban ai jinghikai bad la khmih lynti ha ka liang ka jingai jinghikai, wad bniah, ki kamram ban ai jingsumar bad kiwei ki kamram.
