Ka Myntri Sorkar ka Kong Ampareen kala ban jur ia ka jingdonkam ban iakhun pyrshah iaki bor kiba kam ba ka Sorkar Meghalaya Democratic Alliance (MDA) ba ialam da ka National People’s Party (NPP) kam shym la leh eiei na ka bynta ki paidbah ka Jylla ha kine ki hynriew snem bala leit noh. Haba kren sha ki lad pathai khubor, ka Kong Ampareen kala pynpaw ia ka jingkmen ba ka ioh long kyrtong jong ka party na Shillong Parliamentary seat ha ka ilekshon Lok Sabha, naba kala ioh lut ia ki jingtip ia kaei kaba jia bad ka bym jia hapoh ka Jylla.
“Hadien ka jingleit iuhkjat jong nga ha baroh 36 tylli ki Assembly constituency ha ka por ialap ilekshon, kane ka ilekshon ba san samoi kala pynpaw ba ka kmen ba ka Meghalaya kala kiew bha ha ka roi ka par” la ong ka Kong Ampareen. “Mynta, ngi hap ban iakhun pyrshah ia ki bor kiba ong ba ka Sorkar kam shym la leh eiei na ka bynta ki paidbah. Kane ka dei kaba bakla” kala ong. “La nga jop ne nga rem, nga lah ban ai jingmut mynta ia ka Sorkar jong nga. Nga la tip bha ia kaei kaba dei ban leh haei. Nga la tip shai ruh haei ki jingduna ki don” kala bynrap.
Haba kylli, ka Myntri kala kdew ba ka jingbym biang jong kane ka Sorkar MDA ba ialam da ka NPP ne ka Sorkar ha ki snem bala leit noh ka dei ka jingbym pynmih paidbah ia ki kam ba bha ba kila leh. Ka ong ba kan sa shong ia ka jingialang bishar ia kane ka kam bad ka Directorate of Public Relation (DIPR), kaba hap hapoh ka jingkhmih jong ka.“Ngan sa shong bad ka DIPR ban pynthikna ba baroh ki tnat kin hap beit ban pyntip paidbah ia kaei ka kam ba kila leh “ kala ong. Ka Myntri kala ong ba kala shemphang bha na kane ka ilekshon MP bad ong “La nga jop ne shah rem, ka Sorkar kan ioh jingmyntoi bha na ka jinglong kyrtong jong ka. Nga la rung sha man ki kyndong kynshrot jong ka Shillong Parliamentary seat. Nga tip mynta ia kaei kaba ka Sorkar kan hap ban leh. Nga la leit dalade sha man ki jaka”.
