U Nongialam ka BJP ba long ruh u MLA ka South Shillong Constituency u Bah Sanbor Shullai ula bthah ia u Chief Executive Officer (CEO) jong ka Shillong Cantonment Board ban lum jingialang ha ka 2 tarik u Risaw ban iakren halor ki jingjia ka jingkhaii drok. Ha ka shithi ba la phah sha u CEO, u Bah Sanbor ula pynpaw halor ka khubor ba mih ha ki lad pathai khubor dang shen ha ka 25 tarik u Nailur kawei ka snar nongkhaii drok ka Aisa Khatoon ka la shah kem na Lower Paltan Bazar, Shillong Cantonment Area bad ka long ka dawbah ka jingkulmar ha katei ka jaka ha kine ki katto katne snem ba la dep.
U Bah Sanbor ula pyntip halor katei ka jingjia, yn pynlong ka jingïalang bad ka tnad pulit ryngkat bad baroh kiba don bynta bad ki nongshim wai ia ka jaka Shillong Cantonment Board ha ka 2 tarik u Risaw ha ka por 12 baje mynsngi ha Jhalupara Community Hall.“Ka mat ban iakren ha ka jingialang ka long ban tip ia ki nongshim wai jaka bad ia baroh kiba don bynta ka Shillong Cantonment Board, ba kino kino ki bym shong bym sah bad ki bym dei ki nongshong shnong ka jylla ki dei ban don ia baroh ki kot ki sla ba donkam kynthup ka jingpynshisha na ki pulit na ka jylla ba ki wan lym kumta ym dei ban shah ia ki ban sah namar ki dei ki nongwan buhai shnong be-aiñ bad ka buh jingma ba khraw ia ka imlang sahlang bad ka Ri” la pynpaw u Bah Sanbor Shullai.
U Bah Sanbor ula ong, ba u Myntri Kam Pohiing ka Sorkar Pdeng u Amit Shah ula pynpaw ba dei ban leh tyngeh pyrshah ia ki nongkhaii drok bad ki mynder ri ba wan sah be-aiñ bad halor katei ka bynta ki nongshim wai ha ka thain Paltan Bazar ki dei ban ioh ka jingtip bad lada kim kohnguh dei ban leh tyngeh ia ki. Ula ong, ki trai ba ai jaka rieh tngen ia ki riew sniew dei ban pynngat lang ha ki kyndon aiñ.
