Kiew ka jingdon ki khynnah samla ba thep vote ha Meghalaya

Kum shibynta ban ialap pynshai bad pynshlur ia ki paidbah ban thep ha ka ilekshon MP Lok Sabha ka ophis jong u Chief Electoral Officer ka jylla ka la pynlong ia ka jingiakop kyntip ‘Electofest – The Democracy Quiz’ online bad la ioh ban sam ia ki khusnam sha ki phra ngut ki nongjop kynthup 3 ngut kiba ioh thep vote nyngkong hynnin ka sngi Balang. Ia kine ki khusnam la da u Chief Electoral Officer Dr. B.D.R. Tiwari, IAS ha ka jingdonlang u Joint CEO bah Jonathan Shylla, MCS bad kiwei kiwei.

“Ka jingshim bynta ki samla ha ka jingiakop kyntip ka la ai mynsiem bad pynshlur ia ki paidbah. Ngi ju ong ba samla ki don ka bor ban wanrah ia ka jingkylla  ha ka ri, bad kane ka la urlong shisha namar kum ka ri synshar paidbah ha heh ha ka pyrthei, ka jingai jingmut ki samla ka long kaba dei,” la ong Tiwari. “Lyngba kane ka jingiakop kyntip, la kyrpad ia ki nongthep vote ka jylla ban mih paidbah ha ka 19 tarik Iaiong ban thep vote kawei pa kawei ka vote ka long kaba donkam ban wanrah jingkylla,” ula bynrap.

U Joint CEO bah Jonathan Shylla, (MCS) ula ong, ka jylla Meghalaya la iohi ka la kiew ka jingdon ki khynnah samla nongthep vote mynta u snem bad kane kan ai mynsiem ia kiwei ban iamih paidbah. Ka jingkyntip Electofest ka long shibynta ban ialap pynshai ia ki nongthep vote bad ka jingdonkam ha ka roi ka par ka jong ka election ha ri India bad ha jylla Meghalaya. Ia ka jingkyntip la pynlong kum ka open-for-all format ha Facebook bad Instagram ha ki social media hapoh ka jingpyniaid u CEO Meghalaya bad ka Shillong Quizzing Society, ha kaba la shim bynta palat 1,000 ngut ki briew ha kylleng ka jylla bad kan bteng haduh ba kut ka ilekshon ha ka 19 tarik Iaiong.

Ka Blaridashisha Lyngdoh bad u Abhishek Das, ki samla ban ioh thep vote nyngkong na Nongtrai (Mawsynram) bad Shillong, ki la pynpaw ka hok ban thep vote ia ki samla ka long kaba donkam ban wanrah ia ka jingkylla ia ka lawei ka Ri. “Ngi kyrpad ia baroh ki nongthep vote, khamtam ia kito kiba dang ioh thep nyngkong bad ki samla ba kin mih ban thep vote ha ka 19 tarik Iaiong, 24.”