U Myntri Rangbah ka jylla u Conrad K. Sangma, u la lum ia ka jingialang bad ki heh ophisar jong ka tnad Information & Communication ha kaba ki la iatai sani halor ka jingthmu ban pynbiang ia ka Internet ha ki jaka kiba don ha kyndong kynshrot ha ka jylla Meghalaya. Ha katei ka jingialang ki ophisar sorkar, ki la pyntip ha ka wat banyngkong, la dep ban ithuh ia ki 30 tylli ki jaka ba don ha kyndong ban pynthikna ba kin ioh ia ka Internet. Ki la pynpaw ha u Myntri Rangbah ba ki kam ki la iaid shakhmat ban pynbha bad kyntiew ia ka State Wide Area Network (MSWAN) ban ai ka jingshakri ha kaba ia dei bad ka e-Gov processing bad lyngba kane ka projek, kan don ka jingpyniasnoh lang ia baroh ki District Headquarter, Sub-Division Headquarter, bad Block Headquarter ha ka jylla Meghalaya.
Kumba ka long mynta, ka jingdawa ia ka Internet Bandwidth ka dei 39,130 TB/Bnai ha ka 15.5 Gbps, katba la antad ba ka jingdawa ha ki 5 snem ban wan kan kot sha ka 4-5 lakh TB/Bnai ha ka 200 Gbps, kumta ka tnad Information & Communication ka dang treikam shaid shaid ban pynurlong ia katei ka jingdawa. Ki ophisar kila pyntip ruh ha ka jingialang ba ki dang treikam ban pynlong ia ka nongbah Shillong kum ka International Internet Hub bad ban pynbiang ia ka Wi-Fi kaba shngain bad kaba lait na kino kino ki jingthud ha ka Main bad Additional Secretariat.
Nalor kane la iakren ruh ia ki jingdonkam na ka bynta ban don iaka Meghalaya Tech Parks Society bad kiwei pat ki IT bad kila pyntip ruh ba ia ka Work Order na ka bynta ka Tura Tech Park la dep ban ai bad ia kane ka project la khmih lynti ban pyndep hapoh u bnai Lber 2026.
