Ka St. Anthony’s College hynne ka sngi ka la pynkup burom ia ka samla pule ka Angelia N. Marwein kaba la shah jied ban mihkhnat ia ka Meghalaya ban iashim bynta ha ka jingiakob thei bhabriew kaba la tip kum ka Femina Miss India 2024 ka ban long mynta u snem. Ha kane ka jingpynkup burom ia ka samla Angelia Marwein, la wan ban iashimbynta da ki nonghikai bad ki samla pule bad kiwei kiwei kiba la shah khot sngewbha. U Principal ka St. Anthony’s College ula iaroh ia ka jingiaid lynti ka Angelia kum ka samla pule kaba trei shitom da ka jingtbit ha kiba bun ki liang khamtam haba ka Angelia kam shym la paw tang ha ka jingpule hynrei kala kiew shaphrang ruh ha ki kam kiba iadei bad ka imlang sahlang.
U la bynrap ka Angelia ka la don bynta ha ki kam kiba iadei bad ki hok jong ki kynthei, ban don ka jingryngkat kyrdan hapdeng ki shynrang bad ki kynthei, ka jingiadei bad ka Maitshaphrang Movement bad ka jingdonbynta bad ka EARMACS bad ban kyntiew ia ka roi ka par ha ki thain nongkyndong ha Khasi Hills bad ha kajyll. Ula ong ba ki dap da ka jingsngewsarong ba ka Angelia kan mihkhmat ia ka Meghalaya ha ka Femina Miss India 2024 bad ki ngeit skhem ba kan pynsngewsarong ia ka jylla bad ia ka College.
Ka Angelia kala pynpaw ia ka jingsngewnguh ia ka St. Anthony’s College kaba la ai ia ka jingkyrshan kaba radbah ha ka jingiaid lynti ka jongka bad kala ong ba ka dap da ka jingsngew burom ban mihkhnat ia ka Meghalaya bad ban rah shakhmat ia kane ka jaka pule haba ka leit ban iakhun ia ka Femina Miss India 2024″. Ka nongjop ia ka Femina Miss India 2024 kan ioh ban mihkhnat ia ka ri India ha ka rynsan iakob theibhabriew ha ka pyrthei ne ka Miss World kaba 73.
