U Symbud Myntri Rangbah ka jylla u Bah Sniawbhalang Dhar hynne ka sngi ula ai jingiarap T.50,000 bad ka kitbok kitrwiang ia u Steve Jyrwa ba yn long u lahduh ha ka India Best Dancer Season 4 kaba dei ka rynsan iakob shad hapoh ka ri. U Bah Sniawbhalang Dhar ula aiti ia katei ka pisa ha ka Kong Bibi Jyrwa kaba dei ka kmie jong u Steve Jyrwa, ha kaba la iadonlang u President ka All Meghalaya Dancers Association (AMDA) u Bah Kitbok Thabah.
U Bah Sniawbhalang ula ong ba u Steve ula wanrah nam bad burom ia ka jylla da ka jingiahsimbynta ha katei ka jingiakob khamtam ha kaban pyni iaka sap shad ka jongu bad ula kitbok kitrwiang ia u Steve ba yn rah ia ka nam lahduh ha katei ka jingiakob.
Ula kyntu ia ki paidbah nongshong shnong ka jylla ba kin kyrshan ia u Steve da kaba iashimbynta ha ka jingthep vote khnang ba u Steve yn jop ia ka jingiakob shad bad ula kular ruh ia katei ka kynhun ba yn pyniakynduh ia ki bad u Myntri Rangbah ka jylla u Conrad K Sangma khnang ba na ka liang ka sorkar jylla ruh kan ioh ban iarap bad ban ai jingkyrshan ia u Steve Jyrwa.
U President ka AMDA ula ong, kaba kongsan eh mynta ka long ia ki paidbah ba kin thep vote ban kyrshan ia u Steve ba yn poi sha ka thong namar kumba long ka jingkhlain jong u Steve kadei na ka jingioh point na ki nongbishar hynrei lada u Steve u khlain sa ha ka jingioh vote yn dang lah ban jam shaphrang ban poi syndon sha ka Grand Finale bad ban rah ia ka nam lahduh.
