Ka ding ba shyrkhei ka la klangbad bam ia kiba bun ki bynta jong ka khlaw Catchment Area ka Nongbah Shillong. La suba ba kane ka ka jingpluh ka lah ban dei na ka jingher phylliah ding ne don ba thang khlaw. La iathuh ba kane kala jia naduh ka por 10 baje mynstep bad kane kala sdang najan ki bynta jong ka khlaw tyllong um bam umdih jong kiba bun ki Shnong ha Sor Shillong. Kane ka jingpluh ding kala bam lut ia ki khlaw naduh ka thain Lumparing-Malki haduh ka thain Motinagar.
Ka jingshit kyr-ang ka suin bneng kaba la pynring tyrkhong ia ki khlaw ki bthap bad ka jingjur jong ka lyer, kala nang pyrsut ia ki thylliej sing ba kin pur sted sha kylleng ki bynta jong ka khlaw. Ia kane ka jingpluh ding la lap nyngkong da ki nongtrei ka tnat Khlaw kiba khmih ia kane ka khlaw Catchment Area, kiba la iamih ban iakhun ia ka ding hynrei namar ka jingpyrsut jong ka lyer, kine ki nongtrei kim shym la lah satia ban tehlakam.
Namar ka jingiohi ia ka jingnang pur sted, la pyntip noh mar mar sha ka Tnad Pynlip Ding ka Jylla, kaba la phah ia ki kali pynlip ding sha katei ka khlaw ban iakhun ia ka ding. Kumjuh ruh wat ki paidbah Nongshongshnong ka thain Khliehshnong Malki, Risa Colony bad Motinagar kila iamih ban iarap lem ia ki nongtrei ka Tnad Khlaw bad ki Pulit pynlip ding ha ka jingiakhun ia ka ding.
