Kloi ka sorkar ban iakren iasuk bad ka HNLC katkum ki kyndon ka MHA

U Myntri Rangbah ka Jylla Conrad K Sangma ula pynksan ba ka Sorkar ka kloi ban bteng ia ka jingiakren iasuk bad ka seng kieng atiar ka Hynniewtrep National Liberation Council (HNLC) lada ka kloi ban iaid katkum ki kyndon ba la buh da ka tnat Ministry of Home Affairs (MHA) ka Sorkar Pdeng.Haba kren sha ki lad pathai khubor u Conrad ula ong, haduh mynta ka Sorkar Jylla khlem pat ioh kano kano ka jingthoh na ka HNLC hynrei lada ka HNLC ka kwah ban wan biang sha ka miej ia kren iasuk, ka Sorkar ruh ka long kaba kloi ban pdiang.

“Ka Sorkar ka kwah ka jingiasuk lada ka HNLC ka kloi ban bud ia ki kyndon ba la buh da ka tnat MHA ka Sorkar Pdeng” la ong u Conrad. U la iathuh ka Sorkar Jylla ka ieng ha ka nongrim ba ki don ki kyndon ba la buh da ka MHA bad ka jingiakren ka lah ban long lada ka seng ka bud ia kine ki kyndon. U la bynrap ka Sorkar kam lah ban iaid lait ia ki kyndon ka MHA bad ka MHA ruh kam lah ban pyndonkam da kiwei ki kyndon ia kiwei pat ki kynhun kieng atiar na bynta ban iakren iasuk.

Halor ka jingdawa ban weng ia ki mukotduma pyrshah ia ki dkhot ka HNLC, u Myntri Rangbah ula pynpaw ka jingweng noh ia ki mukotduma pyrshah ia ki nongialam ne dkhot ka HNLC kan shong katkum ka jinglong jong kawei pa kawei ka mokotduma pyrshah ia ki kam beain ki dkhot ka seng.