klur ioh ka Laitdom Presbyterian School na u MDC’

U Symbud Myntri rangbah ka Jylla u bah Prestone Tyngsong haka 29 tarik u Rymphang 2024 ula hair sha Laitdom, Eastern West Khasi Hills District ban plie paidbah iaka 1st Phase jong ka ing skul kaba thymmai jong ka Laitdom Presbyterian Secondary School, ka skul kaba hap hapoh ka jingkhmih ka Mawshut Presbytery. Ia kane ka iing skul kaba thymmai la pynioh da u MDC ka Mairang-Nongkhlaw Constituency u bah Batskhem Ryntathiang napoh ka  KHADC lyngba ka 15th Finance Commission United Grant 2020 – 2021 ha kaba ka proposed  budget na ka bynta ban tei ia baroh ki phase jong kane ka iing skul ka long 3 klur tyngka bad ka jinglut na ka bynta ka 1st phase ia kaba la ioh ban plie mynta ka sngi ka long 55 lak tyngka.

U CEM ka KHADC u bah Pyniaid Sing Syiem ha kane ka sngi ula kular ba ka KHADC kan iarap sa 10 lak tyngka ban pynheh shuh shuh ia kane ka iing skul. U bah Pyniaid ula pan ruh ia ka jingiatreilang na ki paidbah bad ha kajuh ka por ula kyntu ia ki paidbah ba kim dei ban shah ialam bakla namar kumba ka long mynta ka jaitbynriew ka la klet ia ki longshwa kiba la noh ia u synniang na ka bynta ka ri bad ka jaitbynriew bad ha ka jingshah ialam bakla ki paidbah mynta ki la sdang ban ai nam pynban ia kito kiba pynklumar surok ki bym pat noh synniang ei ei ruh em ia ka jaitbynriew kum ki khlur ka Ri ha ka jaka ban ai nam ia kito ki longshwa kiba la noh ia u synniang na ka bynta ka jingbha ka jaitbynriew.

U bah Prestone Tyngsong ula pynpaw ba un shimkhia ban pynurlong ia ka jingangnud ki paidbah ka thain Laitdom ban ioh noh ia ka surok na Laitdom ka ban poi sha Damsait bad ban kyntiew shuh shuh ia ki jaka jngohkai pyrthei kiba don ha kane ka thain. U la ong ruh ba ki don kiba la ialam bakla ia ki paidbah ha kine ki sngi kiba leit man ki iew ban kynnoh bamsap lait phew jait ia ka sorkar da kaba pynrung ruh ia kane ka ktien ha ki khun samla bad ha ki khynnah ha ka jaka ban pynrung ha ki khun samla ia ka mynsiem ialeh u Syiem Tirot Sing.