klur mang ka sorkar ban pynitynnad ia ka Wah Umkhrah

U Myntri Rangbah ka Jylla u Conrad K Sangma ula plie maw nongrim ban tei iaka Project Wah Umkhrah Riverfront Development. Ha kane ka sngi plie maw nongrim, la don lang u Symbud Myntri Rangbah u Bah Sniawbhalang Dhar uba khmih ruh iaka tnat pynroi sor, u Myntri Sorkar u Bah A. L Hek uba dei ruh u MLA ka Pynthorumkhrah Constituency, ka Deputy Commissioner (DC) East Khasi ka Kong R. M Kurbah, ki heh ophisar, ki Rangbah Shnong na kylleng ki shnong ka nongbah Shillong bad ki paidbah. Haba kren ha kane ka sngi, u Conrad ula pyntip ba ka Sorkar Jylla kala mang T.39 klur ban tei iaka Project Wah Umkhrah Riverfront Development kum shi bynta ban pynitynnad iaka jaka ba don harud Wah Umkhrah.

U Conrad ula pyntip ba ha kane ka Wah Umkhrah Riverfront yn don ka jaka shong pynngad, ka jaka pynim nam iaka riti dustur lem bad kiwei kiwei ki jait jingialehkai sngewbha.  Ula ong ba mynshwa ka Wah Umkhrah ka long kaba itynnad bad kaba khuid kaba ai jingmyntoi ia baroh ki shnong kiba don kylleng sawdong jong kane ka Wah hynrei naka ka jingkylla Sor bad ka jingnang roi ka jingdon briew kala pynjaboh ia ka Wah.

“Iaka Wah Umkhrah Riverfront Development, la mang T.39 klur bad ka thong kadei hi ban wanrah biang ka jingkylla jong kane ka Wah daka ba leh khuid bad haka juh ka por ban tei ki jaka shongkai pynngad nalor kiwei kiwei ki jaka lehkai” la ong u Conrad. Haba pyntip ba kane ka Wah ka iaid lyngba bun tylli ki shnong, u Conrad ula ong “Nga kyntu ia baroh ki nong shong shnong ban iatreilang naka bynta ban wanrah biang ka khuid ka suba jong ka Wah Umkhrah bad kiwei ki wah kiba iaid bad kiba don ha sor Shillong”.