klur mang ka sorkar ha ka Chief Minister Youth Development Skhim

U Myntri ka tad Kam lehkai ka sorkar jylla u bah Shakliar Warjri ha Iing Dorbar Thawain, u la pyntip ba ka sorkar hapoh ka Chief Minister Youth Development Skhim ha u snem 2023-24 ka la mang palat T.5.50 klur. Haba jubab ia ka ia ka jingkylli ba la wanrah da u MLA ka Mawhati u bah Charles Marngar, u Myntri ka tnad kam Lehkai u la ong ba ka sorkar ka la mang na bynta ia baroh ki District katkum ka jingdon ki kynhun bad ki club ba la ithuh da ki ophis jong Deputy Commissioner. U la pyntip ba ia ka Shillong bad ia ka Tura la mang T.30 lak hapoh kane ka skhim. Katba ia kiwei ki District ka sorkar ka la mang mar T.17 lak.

“Ka Shillong bad ka Tura ka dei ka nongbah ba heh bad ka jingmang pisa ia ki District ka shong ruh ha ka jingdon jong ki kynhun bad ki club kiba la pynrung kyrteng ha ki ophis jong Deputy Commissioner,” ong u Myntri ka tnad kam Ialehkai u bah Shakliar Warjri. U la pyntip ba hapoh kane ka skhim, la pynlong ia ki prokram kum ka rwai, ka shad, ka jingiakob thoh Essay, iakop iatyrko, Drawing bad kiwei de.

U Myntri haba jubab bynrap, u la pyntip ba ki kyndon ha kane ka skhim, ym lah ban iaid lyngba ki MLA hynrei ka dei ban iaid lyngba ki DC bad ka Directorate of Sports & Youth Affairs.U MLA ka Mawlai u bah Brightstarwell Marbaniang u la ong ba ka sorkar ka mang T.5 klur tam hynrei haba khein ka pisa ba la pynlut ka long tang T.2.30 klur.  U bah Shakliar u la ong ba nalor ki DC, kino kino ki kynhun ki lah ban iaid lyngba ka Directorate bad ka bhah ba tam na kaba la mang ia ki District kan don beit ha ka tnad sorkar.