Ktha khlieh ki kmie ki kpa bym ioh kot, hap die kilo ki kot skul barim 

Ka jingpynkylla syndet ka sorkar ia ki kot pule ia ki skul ka la wanrah ka jingeh ia ki kmie ki kpa namar ka jingjynjar ban ioh ia ki kot pule na ka jingpoi slem palat ki kot. Mynta ka snem, ka sorkar jylla lyngba ka Meghalaya Board of School Education (MBoSE) ka la pynkylla ia ki kot pule jong ki skul da kaba wanrah da ka syllabus jong ka National Council of Educational Research and Training (NCERT). Ha ka jingiakren bad ki katto katne ngut ki nongdie kot ka nongbah, kila iathuh ba namar ba ka dei ki kot pule thymmai dang don ki jingduna ban pyndap ia ki kot bad ka don ka jingsuki ban ioh kot na ka jingslem ban pynpoi bad kane ka la pynthait ia ki kmie ki kpa ban wan wad kot man ka sngi khamtam ia kito kiba dei na jaka nongkyndong. Haduh mynta, ki kmie ki kpa kiba bun ki la ktha khlieh ban leit wad kot ia la ki khun namar ba lada ki ioh kawei na kawei ka dukan, ki hap ban leit sa shawei pat ka dukan bad bun ki dukan pat ki bym pat don ia ki kot pule bad ki hap ban leit phai biang sha la iing ban wan biang ha kawei ka sngi. Ka jingpynkylla ka Meghalaya Board of School Education (MBoSE), ia ki kot pule ka la long kyrkieh bad khohreh palat khlem pyrkhat bad bun ki kot pule kiba rim, ki la shu kylla lehnoh ei lut bad ki nongdie kot ki hap ban shu leit die kilo tang ban lait na kaba shu bret kai hynrei kam myntoi shuh ban iakhein bad ka dor thied.

 “Ngi jynjar palat ban ioh kot, u khun jong nga u pule klas 8, ngim pat ioh lut ia ki kot, hap ban wan wad jan man sngi sha sor ban thied kot”, la ong iwei I longkmie na thain Umroi. Uwei u nongdie kot ha nongbah, u la ong ba ka jingleh ka sorkar ban shu pynkylla hak dak ia ki kot pule, ym tang ba ktah ia ki kmie ki kpa bad ia ki khynnah skul hynrei ka la pynsepei ia ka por namar ba mynta la snai ban ioh ia ki kot na ka jingwan poi slem na jaka shon ne na u nongsam (publisher). “Ma ngi ki nongdie kot, hap ban shu leit die kilo ia ki kot barim tang ban shu lait na kaba bret kai hynrei kam myntoi ban khein ia ka dor thied”, la ong uwei u nongdie kot ha ka nongbah bym kwah ban pynpaw kyrteng. U la ong ba ki nongdie kot kim nud ban pan thied kot shibun na u nongsam namar ba ki tieng ioh ba ka sorkar kan pynkylla biang ia ki kot, kin hap ban shu die kilo beit ia ki lada ym lah die. Katkum ka jingiathuh, ka sorkar jylla ka iateh soskular tang shi snem bad u nongsam ne nongthoh kot (publisher) ia kine ki kot ba pynrung thymmai, kaba la pynartatien ia ki nongdie ban thied bun, ioh ba kin kylla biang.

Ha kajuh ka por, uwei pat u nongdie kot ka Meghalaya Book Stall, u la iathuh ba ki kot pule kim duna hynrei ka jingeh ka long ba ki poi slem kumba 10-15 sngi na u nongsam bad kane ka la buh jingeh ia ki khynnah bad ki kmie kpa naba ka jinghikai klas ruh ka la iaid. “Ban ong ba duna kot kam dei, hynrei ka jingshisha ka long ba ki poi slem, namar ba ia ki kot la pynpoi hadien ba la pan hynrei ki nongdie kim shlan ban thied shibun namar ba ka shong ha ka jingdon pisa jongki”, la ong u nongdie kot. Katba na ka liang jong u trai ka Chapala Book Stall, u la ong ba bun ki kot pule jong ki khynnah ha ki klas bapher bapher ki dang duna bun. U la ong ba mynta u snem ki khynnah pule khamtam na ki thain nongkyndong ki iakynduh jingeh bha haba iadei bad ka jingioh ia ki kot pule namar ka jingbym biang. Ha kajuh ka por, u la ong haba iadei bad ka jinngpynkylla ia ki kot, ka sorkar ka ladei ban pyntip shwa bad kadei ban ai por khambun khnang ba ki nongpynmih kot kin lah ban ioh por ban pynmih kham bun ia ki kot.