Kular ka Congress mar T.1 lak ïa ki samla ba dang wad kam bad ïaki longïing ba duk

Ka Congress ka tyrwa ban pyntreikam daka Right to Apprentice Act ban iarap kaba shi shisnem daka song pisa haduh T.1 lak sha ki samla kiba la pyndep iaki jingpule hynrei ki bym pat ioh kam bad ban pyntreikam iaka Mininum Wage Act. Kane ka jingkular kadei shi bynta ki mat jingkular (Manifesto) jong ka Congress naka bynta ban ilekshon MP 2024. Haba pyntip ia kane u Vice President ka Meghalaya Pradesh Youth Congress (MPYC) u samla Banphiralang Basaiawmoit ula iathuh baka Congress ka don shi bun ki mat jingkular naka bynta ki nong shong shnong ka Ri India lada ka Congress ka wan haka bor hadien ka ilekshon MP 2024.

“ka Congress kala pyllait iaka Manifesto jong ka Party bad ki don shi bun ki mat jingkular hynrei ngin shu pynshai tang katto katne tylli ki mat kiba kham iadei bad ka Meghalaya, kata ban kyntiew iaki khun samla, ki longkmie, nongtrei ASHA, ki nongialehkai bad kiwei kiwei” la ong u Samla Banphira. U Samla Banphira ula iathuh ba ka Congress ka kular ban pyntreikam daka Sport Scholarship naka bynta ki samla kiba hapoh 21 snem kiba don iaka sap haki jait jingialehkai daka jingiarap daka song pisa kaba T.10,000 man u bnai shaki samla ba don sap haka kam ialehkai. Naka bynta ban kyntiew iaki kynthei, ka Congress ka kular ban iarap haduh T.1 lak shaki longïing baduk ha baroh kawei ka Ri bad ia kane ka song pisa yn phah beit haka Bank Account jong ka kynthei.

“Ka Congress ka kular ruh ban mang lypa haduh 50% naka bynta ki kynthei ban ioh kam haki kam ophis ne tnat Sorkar Pdeng naduh 2025 bad kan kyntiew arshah ia kaei kaba ki ASHA ki ioh ka bai nong lada ka Congress ka wan haka bor hadien ka ilekshon MP 2024” ula ong. Naka bynta ki nongbylla sngi kynthei hapoh ka Mahatma Gandhi National Rural Employment Guarantee Act (MGNREGA) 2005 ka Congress ka kular ban kyntiew iaka bai nong shaka T.400 haka shi sngi.

Nalor kane ka Congress kala kular ban pynduh pyndam noh ia ka CAA, ka Farmers’ Produce Trade and Commerce (Promotion and Facilitation) Act, bad ki lai tylli ki ain kam bymman kiba bujli ia ka Indian Penal Code, CrPC, bad ka Evidence Act.