Ka Meghalaya Asha Workers Union (MAWU) hynne ka sngi ka la rakhe ia ka lyngkhuh dap 13 snem jong ka Union ha ka rukom kaba iphuh iphieng bad ba i shongkun kaba ki la pynlong ha Madan student, Jaiaw. Da ki hajar ngut ki ASHA na kylleng ka District, na Khasi Jaintia bad na Garo ki la poi sha kane ka jingjam jong ka MAWU sha u mawmer ba 13 snem jong ka.Kane ka sngi ka la iphuh iphieng bha da ka jingdon ryngkat ka kong Ampareen Lyngdoh, ka myntri ka koit ka khiah kum ka kongsan, u bah Mayral Born Syiem, MLA Nongpoh, u ba long ruh u adviser ka tnad ka koit ka khiah, u bah Charles Marngar, MLA Mawhati, u Ram Kumar, Mission Director ka NHM, u president ka Hynniewtrep Youth Council, bah Roy Kupar Synrem, u Ricky Shullai, MDC barim, ka Sony Kharjana, ka adviser MAWU, ka President ka June Myrsiang bad kiwei kiwei.
Haba ai jingkren ha kane ka sngi ka Kong Ampareen Lyngdoh ka la pynpaw ba da ka jingiatrei ryngkat bad ka sorkar pdeng na Delhi kin pyrshang ban pynioh ia ki jingdonkam ki ASHA.Ka la ong ba ka ju kyntu ia ki ophisar ba dei khmih ia ki ba kin sngap ia ka jingud jingnam jong ki ASHA.Ka la kular ruh ba kan sa pynioh tablet na ka bynta baroh ki ASHA na ka bynta ka jingiaid beit iaid ryntih jong ka kam jong ki, ha kajuh ka por ka la ong ba kan pyrshang ban pynioh ia ki riam kiban pynishongkhia ia ki ryngkat bad ki coat bad ban pynioh ruh ia ka jingsumar ei na ka bynta baroh ki ASHA lyngba ka MHIS ban mab noh ia ki bill ha ki hospital.Ki ASHA ki dei hok ban ioh ia ki jingsumar ei, hynrei kan shu kham shim por khyndiat naba ki hap ban pynbiang ia ka system, haba pynrung ia ki kyrteng bad kiwei ki jingdonkam jong baroh ki ASHA, ong ka kong Ampareen sha ki ASHA.
Ka la ong ruh ba ka sorkar kam dei ka nongshun jong ki hynrei ka dei ka paralok bad ka nongsynran jong ki.Hashuwa kane haba kren maitphang ka president jong ka MAWU ka kong June Myrsiang ka la iathuh ba ia ka MAWU la seng ha u snem 2011 bad ka la ai khublei ia ka kong M. Nongkseh, kaba la long ka president banyngkong. Ka kong June ka la pynkynmaw ruh ia ki por shah thngan ba i long iba sheptieng ban shah thngan, hynrei ban pynioh ia ki jingdawa i la hap ban shong shah thngan.Ka la ai burom ia u Bah AL Hek ba u la pynioh ia ka 2000 tyngka ka incentive, kaba shi bnai ha ka por ba u long u myntri jong ka koit ka khiah bad ka la ai i khublei ruh ia kong Ampareen Lyngdoh kaba la mynjur ban ai sa ia ka 1000 tyngka ka incentive na ka bynta ki Asha. Ha kane ka sngi ki la pynkup burom ruh ia ki 58 ngut ki ASHA kiba la dap 60 snem shaneng.
