Ka North Eastern Indira Gandhi Regional Institute of Health and Medical Sciences (NEIGRIHMS) kan sa pynkiew noh iaka bhah (Quota) pule Doctor MBBS, M.Sc Nursing bad B.Sc Nursing naka bynta ki samla pule ka Meghalaya hapoh kane ka Hospital. Ia kane la pyntip da u President ka Hynniewtrep Youth Council (HYC) u Bah Roykupar Synrem hadien ka jingiakynduh ia u Director bad Deputy Director ka NEIGRIHMS. Haba kren sha ki lad pathai khubor u Bah Roy ula iathuh ba haduh mynta ka Meghalaya ka ioh 14 tylli ki bhah pule (Quota) ban pule Doctor MBBS ha kane ka Hospitla, ka Nagaland ka ioh 10, ka All North East States ka ioh 18 tylli bad ka All India ka ioh 8 tylli bad lada khien kyllum lang, ka NEIGRIHMS ka ioh lypa 50 tylli ki seat ban pule Doctor.“Ha ka jingpeit jong ngi, ka jingbhah lypa 14 tylli ki Seat iaka Meghalaya ka long kaba dang duna namar ka Jylla kam pat don ki Medical College katba kiwei ki Jylla kum ka Nagaland, Mizoram, Arunachal Pradesh kila sdang iala ki Medical College naduh 2023” la ong u Bah Roy.
U Bah Roy ula iathuh ba naka jingialang naka liang u Director ka NEIGRIHMS ula kubur ba shen kane ka Hospital kan sa kyntiew noh iaka bhah (Quota) pule Doctor jong ka Meghalaya.“U Director ula iathuh ba ka bhah pule Doctor MBBS hapoh kane ka Hospital naduh mynta u snem kan nym dei shuh tang 50 tylli ki Seat hynrei yn pynkiew noh haduh 100 tylli ki Seat bad kane ka mut ba ka Quota jong ka Meghalaya ruh kan long arshah” ula ong.Haba iadei bad ka bhah pule M.Sc Nursing and B.Sc Nursing, u President ka HYC ula iathuh ba haduh mynta kam pat don ka jingbhah lypa (Quota) naka bynta ki samla pule ka Meghalaya.
U Bah Roy ula iathuh baka NEIGRIHMS ka ju pynlong iaka All India Exam ban rung Class pule M.Sc Nursing and B.Sc Nursing daka ba shim na kito kiba lah bha iaka eksamin NEET.“Kane ka buh jingeh iaki samla pule ka Meghalaya namar kane ka HYC kala dawa ban bhah kyrpang iaki samla ka Jylla ban ioh pule M.Sc Nursing and B.Sc Nursing hapoh kane ka Hospital” ula ong.“U Director ka NEIGRIHSM ula iathuh baka bhah pule B.Sc Nursing hapoh kane ka Hospital mynta u snem kam dei shuh tang 50 tylli ki Seat hynrei kan dei 100 tylli ki Seat bad ka Academic Council jong ka NEIGRIHMS kala tyrwa ban mang lypa 30 tylli ki Seat naka bynta ki samla pule ka Meghalaya” ula bynrap.
