U Myntri Kam Pohiing ka Ri u Amit Shah ula kular ia ki nongialam ki District Council ka thaiñ lammihngi hynne ka sngi thung ka Committee ban peit ia ki mat jingdawa jong ki District Council bad ban pyndep hapoh ka 25 tarik u Nailar 2024.Ia katei la pyntip da u Chief Executive Member ka Khasi Hills Autonomous District Council (KHADC) u Bah Pyniaid Sing Syiem hadien ka jingiakynduh ia u Amit Shah ha Nongbah Delhi ha jingiadonlang ki Nongialam bad ki dkhot na ki 10 tylli ki District Council ka thain lammihngi.
U Bah Pyniaid Sing Syiem ula ong, katei ka kynhun ba 10 tylli ki Autonomous District Council ha ka thain baroh kawei, ki iakynduh mynta ka sngi ha nongbah Delhi bad ki shong jingialang ba shiteng kynta bad u Myntri Kam Pohiing ka Ri ban pynsngew ia ki jingdonkam halor ka jingdawa pynkylla ia ka khyrnit ba hynriew ne Sixth Schedule ha ka riti synshar ka ri. “Halor ka jingthmu pynbeit thymmai ia ka Sixth Schedule, ngi la pynsngew la ki jong ki jingeh jong ngi bad halor kine ki jingdawa, na ka liang u Myntri Kam Pohiing ka ri, ula ai jubab bad pynsngew ha ngi ba hapoh ka 25 tarik u Nailar yn pyndep ia ka kam ban bishar bniah bad kan sa don ka Committee ban khlieh da u Myntri Khynnah kam pohiing” la iathuh u Bah Pyniaid Sing Syiem.
Ula bynrap kynhun ki khlieh jong ki District Council ka dap da ka jingkmen bad ai khublei ia u Myntri Kam Pohiing ka ri uba la shimkhia ia kane ka kam halor ka jingpynkylla thymmai ia ka Sixth Schedule. “Ngi kyrmen baroh ki jingpynsngew jong ngi ban pynkhlain shuh shuh ia ki Autonomous District Council ha ka thaiñ shatei lammihngi khamtam ia ka jylla Meghalaya bad ban pyniatylli ki nong Meghalaya lyngba ka jingpynkylla thymmai ia ka Sixth Schedule kan ka jingmyntoi bad ka jingkyrkhu ba khraw” la ong u CEM ka KHADC.
