U Myntri ka tnad ka Social Welfare bah Paul Lyngdoh hynne ka sngi ula kular hapoh ka Iing dorbar thawain ka jylla, ba ka Sorkar kan sa thung ia ka Departmental Committee ban bishar bniah ia ka jingtyrwa ban pynkylla ia ka Constitution (Scheduled Tribes) Order, 1950 bad ban wanrah ia ka kaiphod hapoh lai bnai.U MLA ka North Shillong u Bah Adelbert Nongrum ula wanrah ia ka Resolution ban pynsngew ia ka Sorkar Pdeng halor ka jingkongsan ban pynkylla ia ka Constitution (Scheduled Tribes) Order, 1950 khnang ban lah ban weng bad ban pynrung bujli noh ia ka thup jong ki jaitbynriew riewlum ha ka part XI jong ka Schedule jong ka jylla Meghalaya, ha kaba iadei bad jinglong jingman jong ka jylla. Haba ai jubab, u Bah Paul Lyngdoh ula ong ba ka tnad kan sa thung ia ka Departmental Committee ban bishar bniah ia kane ka kam bad ban wanrah ia ka kaiphod hapoh 3 bnai. U Bah Paul ula ong ruh, ba yn sa ïakren bad ki kynhun bapher bapher bad shim ïa ki jingai jingmut jong ki ha shwa ban pyndep ïa ka kaiphod bad hadien katei, yn sa phah sha u Registrar General jong ka Ri India bad kin sa buddien ïa kane ka kam katkum ka rukom treikam ba la buh.
Ula ong ba ha u Jylliew 1999, ka sorkar ka la mynjur ia ki rukom rai ia ki jingkam ban pynrung lang ne weng noh na ki thup jong ki Scheduled Tribe. Katkum kitei ki kyndon ba la mynjur, tang kito ki jingkam kiba la dep ban mynjur da ka Sorkar Jylla, u Registrar General of India bad ka National Commission for Scheduled Castes & Scheduled Tribes kin hap ban ai jingmynjur. Katkum ka Part XI jong ka Constitution (Scheduled Tribes) Order, 1950 (Part III –Rules and Orders under the Constitution) ka dei ka thup jong ki jaitbynriew riewlum kiba la shah dep pynbna ha ka jylla Meghalaya kaba mynta ka don haduh 17 tylli ki jaitbynriew riewlum kiba la pynbna kum ki Scheduled Tribe.
Ula iathuh ba haba ioh pdiang ia kano kano ka jingthoh hapoh ka Minitry of Tribal Affairs ban pynrung ia kano kano ka Jaidbynriew ha ka thup Scheduled Tribe jong ki Jylla/UT, ka Ministry ka sa phah ia kata ka jingthoh sha ki bor ka Sorkar Jylla/UT ban ai jingmut katkum ka Article 342 jong ka Riti Synshar ka Ri. Lada ki Sorkar Jylla ki phah ia ka jingtyrwa, ia kane ruh la phah sha u Registrar General of India (RGI). Lada u RGI u sngewhun ïa ka jingai jingmut jong ka sorkar Jylla, u phah pat ia ka jingtyrwa sha ka Sorkar Pdeng. Hadien kane, ka Ministry of Tribal Affairs ka phah ia ka jingtyrwa sha ka National Commission for Scheduled Castes and Scheduled Tribes ba kin ia ai jingmut.
